يوم العبور

النيل بيرقص وأهرامنا التلاتة معاه
والشعب فرحان سعيد والدنيا مش سيعاه
ومصر أجمل عروسة لابسة ثياب من نور
الله يا يوم العبور الله عليك الله
■ ■ ■
أولادنا كانوا رجال.. كانوا نمور وأسود
حتى فى ساعات الألم كان الأمل موجود
الله أكبر شعارهم والعزيمة حديد
سموا وعبروا القنال فرسان فى يوم مشهود
■ ■ ■
أبطالنا عبروا لسينا بشوق وحب كبير
عبروا بعزيمة وإيمان للنصر للتحرير
ورمل سينا فرح وحضن خطاويهم
وشاف قلوب الأعادى م الفزع بتطير
■ ■ ■
واتحررت أرضنا بعزيمة الأبطال
كسروا قيود أسرها وحطموا الأغلال
وسطروا بدمهم على أرضها بطولات
وضربوا للدنيا فى فنون الحروب أمثال
■ ■ ■
وهل فجر السلام قلنا له بالأحضان
إحنا جنودك وأنصارك فى كل مكان
يا تُلتُميت مرحبة مادام سلام عادل
دا المصرى دايمًا بطل فارس فى كل زمان
■ ■ ■
تحية الحب لرجالنا اللى جابوا العيد
وطلعوا الفجر من ليله بعزم أكيد
تحية للجند.. للضباط.. للقادة
مليون تحية وتحية لذكرى كل شهيد
محمد حسبو الأقرع
عضو اتحاد الكتاب