شهداء أكتوبر

المستحيل مش مستحيل
والشمس نورها بألف ليل
فى قلوب رجال
هزموا المحال
عبروا القنال
غزلوا انتصار
وماكنش غيره ليهم بديل
المستحيل
أبو غنوة مرة فى القلوب
سجنوه
وجابو الفرح لابس أحلى توب
جابو انتصار
لشعب عاش سنين مغلوب
أرواح اتشالت ع أيادى
قالت الله أكبر ع البادى
حلفت لتاخد حقنا
تاخد بتارنا من الأعادى
على أرض سينا كام شهيد
ضحى عشان كلمة وطن
وماكنش غير الله شهيد
على الأسير اللى اتسجن
والأرملة
والطفل اللى مات أبوه
والعوض لا فى الفلوس
ولا فى التمن
فرحوا فى لحظة الانتصار
لما عبرنا وبقالنا تانى اعتبار
رسموا الشهيد رمز الوطن
رمز العطاء والانتصار
يا عيون بتتكلم سنين
باسم الشهيد
مش كفاية نحط اسمه
على يفطة فى شارع جديد
أو نقول فيه قصايد من حديد
لازم نحاسب نفسنا
ونشوف حافظنا على اللى راح
ولا راح دم الشهيد