أنفلونزتنا أحسن من أنفلونزتهم

هذا العنوان ليس تعصبًا لمصر ولا «شوفينية»، وهى التعصب الأعمى للوطن.. لأ طبعًا.. أنا غير منحازة على الإطلاق ولكنى أقول ما يؤيده المنطق والحقيقة.. والطرف الآخر الذى أقارن أنفلونزتنا بأنفلونزتهم هما الخواجات ساكنى قارة أوروبا وقارة أمريكا الفوقانية «الشمالية» لأن التحتانية «الجنوبية» زى حالتنا كده.. بس طبعًا إحنا أحسن برضه، ومن المعلومات الخاطئة جدًا إن الأنفلونزا هى هى فى العالم كله، يعنى اللى فى «كوستاريكا» زى اللى فى مصر لأن الفيروس واحد.. طبعًا لأ.. هذا كلام غير علمى وغير دقيق.. الفيروس واحد لكن الأنفلونزا لأ.. وأقولكم ليه.
1- الأنفلونزا عندنا تلات فترات فى المدارس، كل فترة تلات ساعات بحالهم من غير فسحة ولا حصص أنشطة ولا ألعاب ولا طابور الصباح ولا حتى تدريس، ومع ذلك كل تلات تلاميذ فى دكة واحدة!!
2- عندنا أنفلونزا الكمامات.. يعنى كل التلاميذ لابد يدخلوا المدارس بالكمامة عشان ما يشموش ريحة الزبالة المتكومة حول سور المدرسة أو التى تسد الطريق إلى المدرسة أو من ريحة المجارى اللى طافحة حول المدرسة أو أمام المدرسة أو داخل حوش المدرسة.
3- وزارة الأنفلونزا حضّرت عشرطاشر مليون كمامة، عشان أولادنا فلذات أكبادنا اللى فى المدارس يلبسوها ويتصوروا بيها مع الوزير، لكن أنفلونزتنا بقدرة قادر سلمت الكمامات لبوابين المدارس وتباع الآن بسعر جنيه ونص وفى قول آخر خمسة جنيهات، ولابد من شرائها يوميًا من أجل تخفيف الأعباء عن أولياء الأمور.
4- أنفلونزتنا تطلب من التلاميذ فوطة وصابونة ديتول وعلبة مناديل وكمامة، واللى ما يجبش يتحرم من القعدة على الدكة أم تلاتة ويقعد لوحده بره الفصل فى الهواء الطلق عشان يحرم يخالف تعليمات الوزارة.. ويارب يسقع من الهواء ويعطس.
5- عندنا الأنفلونزا علمت الأطفال الصغار الاعتماد على النفس وفى بعض المدارس لم يجدوا عمال نظافة كفاية وبعضهم لم يجدوا خالص، فقبضوا على العيال وخلوهم ينضفوا المدرسة ويمسحوا الفصول ودورات المياه قبل ما يروحوا بس على شرط كانوا لابسين الكمامة الحمد لله.
6- أنفلونزتنا حولت التعليم من خارجى إلى داخلى.. أى من خارج المنازل حيث المدارس إلى داخل المنازل حيث الدروس الخصوصية.. ولغوا حتى المجاميع اللى كانت بتنفع محدودى الدخل.. لذلك أنا أزعم أن مخترع الفيروس «إيه إتش وان إن وان» مدرس بيدّى دروس خصوصية وهتشوفوا.
7- أنفلونزتنا هى الوحيدة فى العالم التى لها غرفة عمليات وبيانات متتالية.. من أول ما سمعنا بيان المقابر الجماعية وحتى بيان اشربوا ليمون وينسون.. تتوالى البيانات: عندنا تُسعُميت حالة.. ألف حالة.. ألف وسبعين حالة.. الوضع تحت السيطرة الغوا العمرة.. امنعوا الحج.. امنعوا الموالد.. هاتوا كاس العالم للشباب.. هاتوا بطولة الفروسية الدولية.. السياحة تزدهر فى عصر أنفلونزا الخنازير والكمامات.. وجاى مهرجان المسرح التجريبى ومهرجان السينما.. والكمامات هتشح..
أول يوم فى المدارس ولا حالة.. تانى يوم.. ولا حاجة.. رابع يوم حالة واحدة فى القاهرة.. خامس يوم حالة فى سوهاج.. الحالتان مستقرتان.. ربنا يستر.. وإلى اللقاء فى العدد القادم.. يووه.. نسيت.. الأنفلونزا عندهم.. عند البُعدا الخوجات بقى.. ولا حاجة من دى خالص.. اللى بيعطس أو سخن ياخد «تاميفلو» وخلاص.. ولا تحليل ولا عداد ولا قفل مدارس ولا بيانات عسكرية.. متخلفين جدًا.. زى ما قلت لكم ولسه لهم كتير جدًا لما يبقوا زينا.. يا بختنا.