مبروك عليك يا وطن

مطلوب مسؤول
يرعى مصالح الوطن
ف أوقات فراغه..
القطة بتجرى فى قلبه
والفيران كلت دماغه..
لكن عنده النية يكون كويس
اشتغل قبل كده مراكبى
ومش شرط كان هوّ الريس
ولا كان ف يوم ع الدفة..
خبرة ف رش النمل والصراصير
المرتب كبير
ونتعهد بتوفير
الأكل والشرب والسكن
له ولأولاده اللى لسه ف اللفة..
ده غير كهربا وميه
من غير عداد..
وله كرسى ف السيما
وصورة ف الاستاد..
وطريق مفتوح مطرح ما يروح
دائرى.. محور.. كورنيش
ده غير وسط البلد.. وضهر البلد
وطول البلد.. وعرض البلد
ووش البلد.. وقفاها
من ناحية الأتوستراد..
بشرط يفضّى نفسه
ف اليوم ولو ساعة
يتفرج ع السحابة السودة اللى فوق
وتحتها الفساد..
وده طبعا
بعد ما يخلّص كل اللى وراه
ويذاكر للعيال
ويسمع مزيكا
ويتخانق مع الجماعة..
وقبل ما ينام
يرجع يبص بس م البلكونة
بصة سريعة
ع الشارع..
والناس اللى بتضحك
من ورا قلبها..
ولو عرف ينام بعدها..
يبقى مبروك عليك يا وطن..