بالفيديو.. «مسحول الاتحادية» يعتذر للمصريين: «الشرطة سحلتني»

جدد المواطن حمادة صابر، الذي تعرض للسحل أمام قصر الاتحادية، مساء الجمعة، تأكيده على تغيير أقواله أمام النيابة العامة، موضحًا: «قلت الحقيقة بتاعت ربنا، قلت إن الشرطة ضربتني وسحلتني وضربتني بالرصاص وجرتني وضربوني، وخلعوني ملابسي الأولانية جاكت وفانلة من فوق، يقاوموا معايا مفيش فايدة، راحوا مقلعني هدومي لغاية ما وصلت المدرعة، ويقولوا لي أقف على حيلك، ومش قادر، وكل خوفي إني أدخل المدرعة، وواحد قال لي لو اتكلمت هخلص عليك، وقلت أنا راجل كبير».
وأرجع «المتظاهر المسحول» في مداخلة مع الإعلامي شريف عامر، على شاشة قناة «الحياة»، مساء الأحد، في برنامج «الحياة اليوم»، تغييره لأقواله بسبب ما وجده من أهله الذين «اتبروا» منه، قائلاً: «اللي حصل إني لقيت الأهل اتبروا مني، وأهلي كلهم بيعيطوا عليا، وبيتريقوا عليا على الفيس بوك، وبعد ما كنت بطل بقيت إني أخدت فلوس، وأنا قلت الحقيقة بتاعت ربنا، ولو مت فعشان مصر، وبقول لكل واحد في الاتحادية والتحرير أنا بتأسف لكم، ومستعد أبوس على رجلكم».
وتابع: «ماحدش عرض عليا فلوس، بس بصراحة خُفت الأول لأني لقيت المعاملة من أكبر دكاترة وقومسيون طبي فقلت خلاص وعالجوني، وقلت أداري الموضوع عشان البلد مش ناقصة من البلة طين»، لافتًا إلى تأثره بدموع أهله والمصريين، موضحًا بقوله: «لقيت أهلي في المطرية بيعيطوا، ودمعتهم ودمعة المصريين أثرت فيا جامد، وحتى لو مت فبقول لكل مصري سامحني».
ونفى «المتظاهر المسحول» تغييره لأقواله لحصوله على أموال، موضحًا: «لو أخدت مليون جنيه، هعمل إيه بالفلوس، لما أقابل ربنا هعمل إيه، هعمل إيه بالفلوس، (...) الفلوس»، داعيًا الله بقوله: «أنا عاوز ستر من الله، وأنا لا عايز وظيفة ولا حاجة، الغنى غنى الله».
يأتي ذلك بعدما تراجع حمادة صابر محمد، المسحول أمام قصر الاتحادية، عن أقواله أمام النيابة العامة في اتهامه للمتظاهرين بالاعتداء عليه أمام القصر الرئاسي، واتهم في التحقيقات قوات الأمن والشرطة بالاعتداء عليه أمام قصر الاتحادية بالضرب والسحل وتعريته من ملابسه وإحداث الإصابات التي لحقت به.
وأمر إبراهيم صالح، رئيس نيابة مصر الجديدة، بنقل المواطن المجني عليه إلى أحد المستشفيات الحكومية، لتلقي العلاج من الإصابات، بدلا من مستشفى الشرطة.