النهارده عمرى خمسين

مش نفس الأغانى اللى كانت بتفرحك..
مش نفس الحاجات اللى كانت تقدر تخطفك..
وترجعك من تانى طفل صغير..
ولا دى البيوت اللى كانت بتعرف تحضنك
أكيد فيه شىء اتغير..
سنين بتجرى ودنيا كل يوم بحال..
والله أعلم فين هانحط الرحال..
ومادام العمر مهما طال..
قصير..
بتفكرنى ليه بقى..
وتقولى النهارده عمرك خمسين..
لسه قلبك زى حتة الشاش
مش مستحمل حتى نسمة تمر..
ولسه بتتلخبط.
وتدلق العسل ع المر..
النهارده عمرى خمسين..
ولسه مسافر
ولسه دمعتك قريبة
وتزهق وتتخنق وتبعد
لكن ترجع تحن
وأول ما اظبطك عيل
بيجرى ويلعب ويضحك
تقولى الروح
ملهاش سن..
النهارده عمرى خمسين..
الحمد لله إن فيه مبرر
إننا عايشين..
واهو الواد الصغير
كل يوم يهديك إحساس
يساوى ملايين..
أنا عارف إنى مزعج
بس إنت طيب..
واستحملتنى بجد..
وكنت كل حاجة
لما الدنيا ماكنش فيها حد..
أنا بحبك
بس أرجوك تبطل عد..
كل سنة وانت طيب يا قلبى..