عفشتهم قافشة جامد

اللي فاكر العربيات الفيات والبولونيز وكل نوعيات العربيات الروسي والايطالي القديمة هما دول اللي هايبقو فاهمين يعني أيه: (العفشة قافشة) .. بس الباقيين ليهم حق يفهموا ان مصطلح العفشة قافشة دا بيتقال على أي عربية تلاقي موتورها داير وفتيسها شغال، بس ما بتتحركش من مكانها. تديها الأول وتدوس بنزين عشان العربية تطلع لقدام تلاقيها واقفة مكانها مبتتحركش، تجيب مارشدير وتحاول ترجع لورا شوية تلاقيها برضو (محلك سر) .. الحالة دي بيقولوا عليها الميكانيكية؛ العفشة قافشة: يعني فيه مشاكل في أساسات العربية مخلياها مش قادرة تستجيب لحركة التروس عشان العربية تتحرك قدام أو ورا.
وكذلك اخواتنا الإخوان، تحس ان عفشتهم قافشة من يوم 30 يونية 2013 حتى تاريخه، لا هم عارفين يتحركوا لقدام ولا عارفين يرجعوا لورا.
لسة لغاية دلوقتي فيهم ناس مصدقين ان مرسي راجع. رغم أنهم أنفسهم كانوا عارفين انه كان مجرد فردة كاوتش استبن. وفيهم ناس لسة بيقولوا ان اللي نزلوا ف الشوارع يوم 30 يونية لا يتجاوز عددهم 100 ألف مواطن. وطبعا أي حد كان نزل في اليوم دا وشاف أعداد الناس في الميادين هايعرف بكل بساطة ان اخواتنا الاخوان دول يا إما انهم كدابين يا إما تكون عفشتهم لسة قافشة.
لسة لغاية دلوقتي بيقولوا ان اعتصامهم في رابعة والنهضة كان سلمي ولم يكن به أي سلاح، رغم أن الصحافي العالمي "روبرت فيسك" والذي كان متعاطفا معهم، صرح في أكثر من جريدة أنه دخل اعتصام رابعة وخرج منه تحت حماية شاب منهم يحمل سلاح. وحتى من غير كلام "روبرت فيسك"، أي واحد قد تكون أتيحت له الفرصة للدخول الى ميدان رابعة أو النهضة هايكون شاف بعض نوعيات الأسلحة البدائية، وهايعرف بكل بساطة ان اصرارهم على تأكيد ان اعتصامهم في رابعة والنهضة كان سلمي، كلام فاضي وكدب، وإصرارهم على تكرار نفس الكلام لا يعني أكثر من أن عفشتهم لسة قافشة.
لسة لغاية دلوقتي بيقولوا مالناش علاقة بالعنف الداير في البلد، رغم إن واحد من كباراتهم "محمد البلطاجي" قال بالحرف: يتوقف العنف في سيناء في اللحظة التي يتراجع فيها السيسي عن (الانكلاب) ... يعني انتو تقدروا تصرفوا العفريت، من غير ما تكنوا انتو اللي حضرتوه!!! كلام ما يدخلش الدماغ .. وإصرارهم على تكراره يؤكد إن عفشتهم لسة قافشة.
....
ياترى ايه اللي حاصل في عفشتهم ... أنا مش ميكانيكي وماقدرش أحكم. بس أقدر أنصح بضرورة عرضهم على ميكانيكي شاطر. مش ميكانيكي واحد بس، دول عايزينلهم كونسلتو ميكانيكية عشان يقدر يحل مشكلتهم وينصحهم ازاي ممكن يتحركوا شوية. حتى ولو كانت تلك الحركة للوراء قليلا ... أصل قفشة العفشة حالة صعبة وممكن تدوخ أي سواق. ربنا ما يوريكم زنقة العفشة لما بتقفش.
.....
عموما، قفشة العفشة في مصر حالة سائدة عند الكثيرين، مش بس الإخوان ... يعني لو فكرت مثلا في حال الأحزاب، أو الإعلام الرسمي وفي القلب منه التليفزيون المصري، هتلاقي برضو عفشتهم قافشة. بس دول عفشتهم قافشة منذ عقود؛ ومافتكرش هاينفع معاهم مجرد كونسلتو ميكانيكية، دول محتاجين خبير مفرقعات، ينسفهم بضغطة زر واحدة.
المشهد.. لا سقف للحرية
المشهد.. لا سقف للحرية
المشهد.. لا سقف للحرية
المشهد.. لا سقف للحرية