مشمش الجيزة

موسم المشمش قصير، يدوبك شهر والتاني وتنزل تدور عليه ف السوق تلاقيه خلص. هي دي طبيعته، المشمش كدة، طبيعته كدة، ربنا خلقه كدة، يظهر شهر واحد ف السنة، الحقيقة العلمية الجغرافية الطبيعية تؤكد أن المشمش فاكهة شحيحة. ورغم ندرة ظهوره في الأسواق، شهر أو بالكتير اتنين كل سنة، ظل مشمش الجيزة (د. علي عبد الرحمن) محافظا لها منذ بدايات الثورة حتى تاريخه.
...
دا شكله مشمش من نوع فريد، مشمش مهجن، تلاقيه في السوق صيف وشتا، ربيع وخريف .. تلاقيه ف سوق المجلس العسكري، وسوق الإخوان، وسوق عدلي منصور، وسوق السيسي.
...
د. على عبد الرحمن، 66 سنة، حصل على بكالوريوس الهندسة المدنية من كلية الهندسة جامعة القاهرة ، ثم الماجستير والدكتوراة من إحدى جامعات كندا. تدرج وظيفيًا في جامعة القاهرة حتى أصبح عميدا لها اعتباراً من 6 أغسطس 2004 ، وأخيرًا محافظا للجيزة اعتبارا من 14 إبريل 2011 حتى تاريخه.
هو أقدم مسئول حكومي ذو منصب رفيع في مصر. صدر قرار تعيينه ضمن حكومة "عصام شرف" واستمر مع حكومة "الجنزوري" في عهد المجلس العسكري، وأبقى عليه "هشام قنديل" ضمن حكومة الإخوان التي جاء بها الاستبن مرسي، وبارك وجوده "حازم الببلاوي" ثم "إبراهيم محلب" في عهد الرئيس عدلي منصور، ولم يتم تغيير ه أيضا بعد أن تولى السيسي رئاسة البلاد بأغلبية ساحقة.
...
أنا من سكان الجيزة، ومثلي كثيرون، لم ألحظ أي تغيير يذكر في شوارعها وحواريها وميكروباساتها، وجمعياتها الأهلية، وإدارات أحيائها، ومدارسها، ومستشفياتها، وأكوام قمامتها، وأعمدة الإنارة فيها، وأشكال الكلاب الضالة، وعفانة رائحة القطط النافقة عند نواصيها.
...
الجيزة لسة زي ما هي رغم مرور أكثر من ثلاثة أعوام على بزوغ عصر الخامس والعشرين من يناير. التغيير الوحيد اللي حصل فيها إن مشمشها بقى موجود علطول.
....
أنا باموت في المشمش، باعشقه، وباستناه من السنة للسنة، ولما يظهر في السوق أنزل كل يوم اشتري منه كيلو واتنين وتلاتة، أأكل منه اللي قد ما أقدر، وأحط الباقي في التلاجة. ولما ينتهي الموسم بتاعه، كنت أبدأ أشتري مربة مشمش، وأدور على حد بيعمل منه عصير. بس مكنتش بالاقي ... دي مشكلتي الوحيدة مع المشمش .. مش بالاقي منه عصير .. معقولة مفيش ولا شركة فكرت تعمل منه عصير.. ليه؟ .. مش عارف.
ياريت لو كان "السيسي" ناوي يحتفظ بالدكتور علي عبد الرحمن محافظا للجيزة في حركة المحافظين اللي جاية، يبقى يكلملنا حد من رجال الأعمال اللي عندهم مزارع مشمش ومصانع عصير، يبقوا يضربوهولنا (المشمش) في الخلاط ويعبوه في علب كرتون صغيرة، ويكون معاها شفاطات .. علشان نعرف نشربه بشويش.
أما انه يفضل كدة زي ما هو، كتير أوي برضو.
...
حِزبِنا (حَسبُنا) الله ونعم الوكيل.
...
التوقيع: مواطن من الجيزة.
من العدد المطبوع
من العدد المطبوع
من العدد المطبوع
من العدد المطبوع