"كُحل الغرام" تفوز بجائزة العامية فى منتدى "عاطف الجندى"

فاز الشاعر بكرى جابر بجائزة "قصيدة العامية" فى المسابقة التى نظمها منتدى "عاطف الجندى الأدبى" عن قصيدته "كُحل الغرام".
يذكر أن بكرى جابر الملقب ب"أبوالنيل" ولد فى في 8 مارس، 1968، بمحافظة الفيوم، عضو اتحاد كتاب مصر وصدرت له عدّة دواوين، كما يعكف الان على إنتاج نقدى بعنوان "التيار الصوفى فى شعر المعاصرين.
"المشهد" تنشر القصيدة الفائزة "كحل الغرام".
مسجون ف حضرة ده الولي
والقبة عتمة
والعينين متعصبين
فارد ضلوعي ف الخلا
ومحنى ايدى بالأنين
كحلت عينى ف الهوى
بكحل الغرام
وبقيت ضرير
وبعلو صوتى بابتهل
يا ام العذاب يا ام الحنين
ألفين مدد..
لو تعطفي..
تشفي العليل
واقف هنا
على بابك المفتوح ميدان
وانتي الإمام
وانى الولى
وبتمنحي بس العويل والمفتري
وتحلي شعرك للغريب
وبتسقي خمرك للكئيب
وبتفتحي صدرك براح
للعاشقين والمغرمين
سب الولي!!!
يا مفترى..
وانا اللى عشت العمر
شايلك ف الضلوع
قبلة و ولي
ولا كنت أنام
إلا اما اطوف حول المقام
واصلى ليكى ركعتين
وف المنام
لو مرة انام
اخلع عيونى ع الضريح
وافرش دموعي ع الحصير
واحضن تراب سيدنا الولى
يا مفتري
ما عدت عاشقك ف الصباح
ولا ف المسا
كتر القسا فتح عنين المغرمين
والقبة زور
ريحة بخور غدر الولي مالية المكان
والصف والمجاريح كتير
فاردين شعورهم كالغمام
بايعين ضميرهم للشيطان
وبيشربوا نخب الولي
يا مفترى..
ما عدت لي نعم الإمام
ولا لي ولي
يا فجر راجع من بعيد
نبت ليه جوه الضلوع
وليه ما جيت قبل الضياع
قبل أما اموت
قبل أما يسكن قلبي الولي
وبقيت غريب وسط الطريق
وبقيت اشوف كل الوشوش
وش الولي