فى خطوة وصفت بالجبارة والغير مسبوقة. قال الباشمهندس محلب رئيس الوزرا الجديد. انه اصدر تعليماته. بمنع شرب المية المعدنية. داخل اروقة مجلس الوزرا. ومش كده وبس بل ومنعها كمان داخل مكتبه العامر. اما السبب فهو التقشف .وان يحس هو ورفاقه الوزرا بمعاناة الناس ويشاركوهم شرب مية الحنفية.. وزيح العيا مر.. وربنا معاكم وانتم زينا بتشربوا من الحنفية دوغرى. و الريس .اقصد رئيس الوزرا فى تصريحه.طالب كمان .. ان يقتصر موكبه على سيارة واحدة. والله المعين الحارس الواقى. وزى ما أل انه بيثق فى الامن المصرى. والاهم انه بيعمل كل ده .ترشيدا للاستهلاك والنفقات. الى هنا وكل شئ عال العال. وما حدش يقدر يقول فيه اى كلام . ولكنه . لم يجب عن اسئلة اهم يعرفها المواطن المصرى الغلبان. وبيسالها مع كل وزارة رايحة. وكل وزارة جاية . خد عندك مثلا: وماذا عن النفقات للشاى والقهوة. ولزوم الضيافة فى كل وزارة. وفى مجلس الوزرا نفسه. وماذا عن البدلات والسفريات للوزرا. وللى عاملين معاهم. او جوا مجلس الوزرا نفسه. وماذا عن بنزين عربيات الوزرا والشركات والمؤسسات والهيئات التابعة لها. وانا معاك للصبح فى الباقى . وماذا عن نفس البنزين. لعربيات رئاسة الوزرا. ثم ماذا عن بدلات حضور اجتماعات مجلس الوزرا. وبدلات طبيعة العمل فى حب مصر بلا مقابل. والحوافز والذى منه للوزرا. ورئيس الوزرا. وحتى اصغر موظف عند الوزرا. ورئيس الوزرا . وكمان عندك ماذا عن ولائم الوزرا. ورئيس الوزرا. وخد عندك ما يضرش برده . بدل مظهر الوزرا ورئيس الوزرا.. و و و و خد عندك لا خر الشارع ! الحكاية يا سيادة رئيس الوزرا.مش انك تشرب مية من الحنفية. زى باقى خلق الله. اللى عايشين فى مصر المحروسة. او انك تقلل الموكب .ترشيدا للنفقات! ولكن .. الحكاية انك تخلى كل ده .. حاجة عادية جدا. ومش منة منك . لا سمح الله. ولا من زملائك الوزرا . الحكاية اننا عاوزين رئيس وزرا ووزرا. بيحسوا بخلق الله. اللى اسمهم المصريين. ومفيش مانع ان الوزير. بدل ما يقضى الويك اند فى شارم او مارينا او السخنة. اوحتى فى بيفرلى هيلز. انه يتواضع.. ويقضيها على كوبرى امبابة. ويشرب حمص مع الغلابة. او يلف شوية على كعوب رجليه فى وسط البلد. ويشوف الباعة الجائلين. عملوا فيها ايه. او يركب مترو الا نفاق. اواتوبيس للنقل العام. الله ما يوريك. والأهم من ده وده. انه يخاطر. ويقف فى طابور انبوبة. او طابور عيش من ابو الخمس قروش . ويشوف ايه اللى ممكن يحصله من الناس. لو عرفوا انه وزير. او ريس الوزرا بتاع التقشف بنفس ذاته؟
