لو بقيت رئيس جمهورية هسيب كل واحد يشرب اللى هوه عايزه .. المهم مايتخانقش مع الجيران غنيت لعمرو موسى عشان القافية كانت راكبه عليه وعلى إسمه الثورة كشفت الحرامية .. وهغنى لها قريب وهقولها أحلى كلام أنا ماتلونتش زى ناس كتير اتلونوا .. واللى غلط يدفع تمن غلطته هعمل أغنية مخصوص للبطل احمد الشحات .. وكان نفسى اعمل زيه هوايتى رش الميه وغسيل العربيات .. وشعبيتي أكبر من شعبية أي سياسي
حوار – إيمان صديق ما بين مؤيد ومعارض يقع المطرب الشعبي شعبان عبد الرحيم بين كفى الرحى بسبب ما يتمتع به من شعبية كبيرة وأسفه فى نفس الوقت لمحاكمة بعض رموز النظام السابق لما كان يربطه بهم من علاقات إنسانية طيبة الأمر الذى قد أغضب الكثيرين منه رغم أنه حاليا يؤيد الثورة بعد أن كان قد أخذ منها موقفا فى بدايتها لأنه على حد قوله " ماكانش فاهم حاجه " وعندما فهم كان له موقفا مغايرا لما كان عليه . عندما التقيت ب "شعبولا " لم أجد فيه سوي شخص بسيط متواضع ذائب بين طبقات المجتمع وخارج من أحشائه ، ولم أجد فيه من الكلفة والدهاء مما يتوافر في الكثيرين ممن تلونوا بعد الثورة وأخفوا موقفهم الحقيقي منها وراحوا يمارسوا عادتهم القديمة " اللعب على كل الحبال" . كان شعبان أكثر شجاعة وتلقائية من هؤلاء وأعلن موقفه بكل وضوح وصراحة والذي يراه- من وجهة نظره- من باب الأصل والعرفان بالجميل وكان للمشهد معه هذا الحوار الذى نكتبه بلغته ونسجله بمفرداته . • هل تشعر بإختلاف في مصر بعد الثورة ؟ نعم .. مصر إختلفت كثيراً بعد ثورة 25 يناير في حاجات كثيرة ، ولكن غياب الأمن في البلد " حاجة مزعلاني أوي " وعلي فكرة مفيش حاجة اسمها بلطجية ، والناس اللي بيعملوا كده هم مش بلطجية وهم في الحقيقة شوية عيال صغيرين ميعرفوش إن الأفعال اللي بيرتكبوها عقوبتها كبيرة وهم مأجورون فيه ناس مسلطاهم على البلد ناس عاوزه تخربها. وعلى فكرة ضابط الشرطة عارف البلطجية الحقيقيين ويقدر يلقي القبض عليهم .لكن اللي ظهروا علي الساحة بعد الثورة مش هما دول البلطجية الحقيقيين وقلة الحكومة خلت الناس كل واحد يعمل اللي عايزه . • وفي رأيك .. مين الناس دول ياعم شعبان ؟ الناس الوحشة اللي كانت بتستفيد من النظام والسلطة " المحاسيب " يعنى . • حدثنا ياعم شعبان عن علاقتك بالنظام السابق ؟ أنا كنت عارف رجالة النظام زي أي حد في البلد ، ولكن بحكم طبيعة عملي كمطرب كانوا بيدعوني في حفلات أولادهم أو حفلات لهم ، وبعدين مين كان يتوقع اللي حصل في البلد ده وكلنا كنا بنتعامل معاهم علي أنهم الناس الكبار في البلد وماكنتش اعرف أنهم حراميه ، الناس دى خدعتنا وسرقوا البلد وبعدين ربنا هو اللي عمل كده عشان يكشف حقيقة الناس المفترية اللي بيظلموا الناس الغلابة. • يعني انت شايف إن الثورة عادت علي البلد بالنفع أم بالضرر ؟ طبعا عادت علي البلد بالنفع وجاءت " مصلحة " عشان كشفت الحرامية وسلمتهم للمحكمة والعدالة . • ولماذا قيل عنك بعد الثورة انك ضدها وانك من الفلول خاصة بعد الأغنية التي هاجمت فيها البرادعي ؟ أنا مش ضد الثورة ولكن أنا زي أي واحد في البلد مكنتش فاهم حاجة في أول الثورة وكنت حاسس إن البلد بتتخرب بسبب الفوضي والسرقة في الشوارع والبيوت وكنت حاسس إن البرادعي هو السبب .. ولكن لما فهمت الثورة إطمنت وفهمت أن الشعب والناس هي اللي عايزة الثورة دى . • وما حقيقة علاقتك بزكريا عزمي وكيف بدأت ؟ أنا علاقتي بزكريا عزمي بدأت من خلال أخيه اللواء يحيي عزمي هو حبيبي وأنا كنت حضرت أفراح تبعه كتير وهو اللي عرفني بزكريا عزمي .. والراجل ده أنا مشفتش منه حاجه وحشه وأكلت عيش وملح في بيته ، يبقي هو لما يغلط ذنبي أنا إيه ، أنا متلونتش زي ناس كتير إتلونوا وكانوا بيطبلوا ويزمروا للنظام ورجالته ولما وقع كترت سكاكينه ، لكن أنا عندي أصل واللي بحبهم هفضل أحبهم . واللي غلط يتحمل مسئولية غلطته ويتحاسب ويدفع ثمن غلطته . • تقصد مين بالناس اللي "إتلونوا " ؟ ناس كتير بالذات مذيعيين برامج التوك شو • هل استفدت بأي شكل من النظام السابق ؟ أنا زي ما أنا أثناء النظام وبعد النظام وقبل الثورة وبعد الثورة شغلتي هي هي مكوجي ومغني شعبي في الافراح والحفلات وهذا من فضل ربي ، وشغلتي هي مصدر دخلي الوحيد . • لماذا لم تفكر في ترشيح نفسك لأي منصب سياسي وأنت تحظي بشعبية كبيرة ؟ أنا مش فاضي .. وكمان أنا مؤمن أن لكل واحد شغلانة فاهم فيها كويس ومينفعش واحد يشتغل كل حاجة ، وكمان أي منصب سياسي يتطلب شهادة وتعليم وثقافة وأنا مش متعلم لكني دخلت مدرسة الحياه وإتعلمت فيها حاجات كتير. وأي منصب سياسي له مسئوليات كتير أنا مش قدها . • لكن إنت مش حاسس أن هناك سياسيين بيستغلوا شهرتك وشعبيتك في دعاياتهم الإنتخابية ؟
مفيش فرق بيني وبين أي مرشح لمنصب سياسي خاصة أعضاء مجلس الشعب ويمكن أنا ليا شعبية أكثر منهم في كل مكان في مصر وشعبيتي أكبر من شعبيتهم . • ما هي خططك الفنية في الفترة المقبلة ؟ أنا مش بخطط لشغلي لكن لما بحب أغني لحاجة بغنيلها وانا هغني للثورة قريباَ وهقولها أحلي كلام وأي شغل جاي هيكون أحلي من اللي فات . • هل تفكر في إعادة تجربة برنامج " هات م الأخر " ؟
تجربة تقديم برنامج في التليفزيون كانت حاجة كويسة وأنا كنت مبسوط بيها ونجحت مع الجمهور وأنا كنت بعتبرها " نحتاية أو سبوبة " واللي رشحني ليها أسامة الشيخ وهو اللي كان مختارلي "اللوك" بتاعي وشكلي علي الشاشة، وأنا مكنش بيعجبني كلام المعد فكنت " بنفضلو" وأتكلم أنا مع الضيف من غير ما أحاول أزعله ولو اتكرر العرض هكرر التجربة تاني . • لمن تعطي صوتك في انتخابات الرئاسة القادمة ؟
لعمرو موسي . • لماذا عمرو موسي بالذات ؟ لأني بحبه . • وإيه سر حبك ليه ؟ بحس إن وشه سمح وعنده قبول وكاريزما . • بيقولوا انك غنيت لعمرو موسي لأنه بتربطك بيه مصالح ولأنه كان بيسهلك بعض الأمور..ما تعليقك ؟ الكلام ده غير صحيح وأنا غنيت لعمرو موسي بالذات لأن القافيه كانت راكبه عليه وعلي إسمه . • لو فرضنا َ إنك رشحت نفسك لإنتخابات الرئاسة ونجحت .. ما أول قرارتاخده ؟ أنا لو بقيت رئيس جمهورية مصر أول حاجة هعملها هسيب كل واحد يعمل كل حاجة هو عايزها ومش همنع أي حاجة وهصدر قرار "اللي عايز يعمل حاجة يعملها واللي عايز يشرب حاجة يشربها " وهسيب كل واحد لضميره وأهم حاجة إن الناس " متخانقش " الجيران . • لماذا تركز علي خلافات الجيران دون غيرها من الخلافات ؟ لأن الجيران مهمين في حياتنا هما اللي بيحمونا ويلحقونا في أي مشكلة أو أزمة أو مصيبة . • وياتري أنت علاقتك بالجيران جيدة ؟ أنا علاقتي بجيراني كويسة جداَ وعشان كده أنا طول الوقت موجود وسط الناس ولا أنفصل عنهم ومعظم وقتي بقضيه في الشارع ،ولم أحجب نفسي عن الناس . • كيف تتمني أن تري مصر في المرحلة القادمة ؟ أتمني أن أري الناس مخلصة " ومحدش يزعل حد " واتمني أشوف البلد كلها خضرا ومفيش زبالة في الشوارع ومفيش زحمة والأمن مستتب زي زمان والحكومة تنزل الشوارع تاني ولازم الناس تعرف أنه " اللي بيخاف من الحكومة هو اللي مش كويس وعلي رأسه بطحة " ونفسي الجيش يرجع يؤمن الحدود خاصة بعد أحداث سينا . • ما تعليقك علي أحداث سيناء مؤخرا ؟ إسرائيل خسيسة طول عمرها وقليلة أصل وأنا أعلنتها من زمان " أنا بكره إسرائيل " • ماذا تقول "للواد الجدع " الذي قام بإنزال علم اسرائيل من علي السفارة الإسرائيلية ؟ ده ولد راجل وجدع .. بطل وشجاع زي كل شباب مصر وأنا كان نفسي أعمل زي ما هوعمل وأنا هعمله أغنية مخصوص ليه . • تحب تقول إيه للمسئولين بعد ثورة 25 يناير ؟ أقول للمسئوليين يعطوا الاراضي للناس الغلابة والشباب بدلَ من النصابين والحرامية اللي إستولوا عليها من أول هنا وحتي الساحل الشمالي ، عشان يبنوها ويعمروها وتنفض الزحمة من القاهرة والمدن . • تفتكر المسئولين هيعملوا كده يا عم شعبان ؟ للأسف المسئولين في بلادنا بيفكروا في نفسهم بس حتي بعد الثورة ومش فاضيين يفكروا في مصلحة البلد عشان كده الناس مش حاسة بتغيير ، وكل واحد بيأخذ قطعة أرض لأبنه وحبايبه ومعارفه كده من غيرمقابل"جدعنه "، فمثلا منطقة 6 اكتوبر متباعة لرجال أعمال وهي أراضي صفراء يبقي فين حق الشباب . • ما الأمور التي أغضبتك بعد الثورة ؟ السرقة في الشوارع "عيني عينك " والسطو علي البيوت وغياب الشرطة حتي لما المواطن يستنجد بالشرطة لا تنجده ولا تهتم بسبب خوفهم من أي تعرض أو إشتباك مع الشعب . • ما هي هوايتك المفضلة ؟ رش المية وغسيل العربيات والشجر والقعدة قدام بيتى في الشارع مع الناس . بالفيديو .. " شعبولا "يفتح قلبه للمشهد ويمارس هوايته السياسية
