عكس عكاس .. صفحة النصف مليون قاريء يحررها الكاتب الساخر خالد الدخيل

دولة حظها وحش
صح ان ايطاليا بتستعبط لما تطلب تفريغ 2 مليون مكالمة لسكان المهندسين ، وصح ان فيه تعنت واضح واستعلاء ، ومساس بالسيادة المصرية ، واستثمار مشبوه للأزمة لصالح الانتخابات في ايطاليا...
لكن يصح برضه ان الجانب المصري ضعيف ومهزوز وسامح بكل التجاوزات دي لانه مقتنع في قرارة نفسه ان التهمة لابساه لابساه
المشكلة الأكبر في المعسكرات المتفرغة للهري على فيس بوك وتويتر ، مع وضد
لو بتدور على معلومة بلاش تدخل في السكك دي ....فيه صور متشيرة في كل حتة لأنجلينا جولي وهي معصعصة ووزنها 35 كيلو حسب المعلومة اللي مع الصور ومحدش عارف هي مريضة زي ما نص الناس بتقول ولا هي عاملة كده علشان تجذب تعاطف العالم مع الجوعى زي ما النص التاني بيقول !!!
وفيه صور تاني لتمثال ابراهيم باشا متغطي بالمشمع ...ناس بتقول ان ده مزايدة رخيصة من الدولة المصرية علشان السعودية بتكره ابراهيم باشا اللي حاب الوهابيين وناس تاني بتقول كلام مختلف (بالمناسبة التمثال متغطي من كذا اسبوع ومالوش دعوة بزيارة الملك سلمان ) وتقدر تقول باطمئنان ان محدش من الضيوف يعرف مين ابراهيم باشا أصلاً ..!!!
هي الدولة دي حظها وحش ومش بتعيش لها انجازات
تعمل قناة سويس جديدة يطلعوا لها بقوائم الخساير وحكاية السفن اللي بقت تستخدم رأس الرجاء الصالح ...
تجيب الملك سلمان في زيارة 6 ايام معاه 18 وزير ورجال أعمال و300 مليار جنيه ومشروع كبير هيغير شكل المنطقة ...يطلع لها كلام تاني عن اسرائيل اللي ضغطت علشان يقفلوا قناة المنار ...ويفرجوا عن السلفيين ...
تطلع لها من تحت الأرض مشكلة ريجيني ...تدوّر على حلول ...سيناريوهات ...تخريجات ....أي حوارات تقدمها للجماعة الطلاينة ...يطلع لها مخبر غبي يألف حكاية عبيطة تزيد الوضع سوءا ...وتخلي شكلنا في غاية البهدلة والإحراج ( بين قوسين : الحكاية العبيطة كانت دموية للأسف ...انتهت بقتل ناس غالباً غالباً ابرياء دمهم في رقبة كل اللي سمح بقتلهم وحاول يقفل الملف بصور جثثهم )
تبدأ تلم الليلة مع حرامية نظام مبارك ورموز عهده الميمون ...تاخد منهم فلوس تمشي حالها مقابل "التغاضي " عن جرايمهم ....تصطلح مع حسين سالم ملك سينا الجنوبية ومهندس التطبيع الأكبر ....وزكريا عزمي اللي محدش يعرف سقف الجرايم اللي عملها ...وباقي الشلّة .... تفرقع في وشها فضيحة وثائق بنما وتكشف لها مبارك وعصابته وولاده وهم بيقطعوا من لحمها الحي وبيبيعوه حتة حتة .....ويحولوه أرصدة في خزاين الأمان هناك
هو مين ده اللي مترصد للبلد وشادد حيله عليها
ماتسيبونا نكمل من غير دوشة ولا صداع
علاء مبارك
علاء مبارك
ريجيني
ريجيني
ريجيني كمااان
ريجيني كمااان
---------------
كرم الضيافة على الطريقة المصرية
اتربينا على حسن استقبال الضيوف من زمن طويل ...لما كان بييجي ضيف خاصة لو غريب كلنا نلبس اللي ع الحبل والبيت بيبرق من النضافة ...أحسن أطقم يتقدم فيها الأكل والشرب ...ولو مفيش نستلف من الجيران
ده ميراث ياجماعة قبل ما نركز على الكرم المصري الزايد عن الحد في استقبال ملك السعودية ...
دي اول زيارة من نوعها لجلالته ...والراجل جايب معاه 18 وزير غير المستثمرين ... واستثمارات ب 300 مليار جنيه في الظروف السودا دي ....كنا هنعمل معاه ايه يعني ؟
لما تبقى بتتريق على الزيارة وبتسف على الصورة بتاعة البنت الصغيرة مع الملك والرئيس تبقى انت مبتحبش بلدك ولا عايز لها الخير
ولما تتضايق انهم قفلوا منطقة بحالها في أزحم مدن العالم بالسكان علشان جلالة الملك قاعد في الفور سيزون تبقى مواطن فاضي وبتتلكك ومعندكش أخلاق الضيافة ...تخيل الضيف واللي معاه ممكن يرتاحوا واصوات كلاكسات العربيات شغالة 24 ساعة في الشارع ..؟ ولا لما حد فيهم يفتح الشباك يتفرج ع النيل ويشد شوية هوا نضاف ...تفتكر هتبقى مبسوط لما يشموا ريحة التلوث والدخان اللي طالع من شكمانات العربيات ...
طبعاً ممكن تزوّد في تقل دمك وتتكلم عن المعتقلين المصريين هناك ؟ انت قادر تعمل حاجة مع اللي هنا أصلاً ...ولا عايز كمان تجيب سيرة السلفيين اللي افرجوا عنهم ...قول ....
ولا تجيب سيرة شهادة الدكتوراة بتاعة جامعة القاهرة ..
ولو معجبكش اننا نعمل سهرة تلفزيونية خاصة تحت سفح الاهرامات بمناسبة الزيارة ....متتفرجش عليها
الظروف اليومين دول لاتسمح بوجود نوعيات من عينة قاسم السمّاوي والناس اللي دمهم تقيل والحقد مالي قلوبهم ....
صفوا النية وخلونا نكمل من غير دوشة
خلال استقبال الملك
خلال استقبال الملك
------------
إلى أحمد عبد الله .. إنزل من ع المنبر كفاية خطب
السيناريست حاجة وخطيب الجمعة حاجة تاني خالص ، حضرتك الأفلام اللي بتعملها مش منبر وعظ وإرشاد ، ولا هي فرصة عمر سيادتك علشان تخوّفنا من الطريق الغلط من وجهة نظرك ، والدراما عموماً ...أي دراما عبارة عن جسم له راس ورجلين وايدين وعمود فقري ، واللي بتعمله ده يشبه الدراما بس ، ولولا سامح عبد العزيز كان زمانك فرجة للي رايح واللي جاي ..
في فيلم كباريه قلت اللي عندك وعديناها...كل الناس الشريرين الوحشين ماتوا والحمد لله وحضرتك انتقمت لأفكارك والناس تجاهلت وقتها العبط اللي كان مالي الفيلم من أوله لآخره وركزت في مزايا تاني زي التمثيل ( فتحي عبد الوهاب وماجد الكدواني ومحمد لطفي ) وفيه ناس تاني ركزت على شوية السكس والاغاني واهي اتسترت والفيلم نجح
تقوم تعمل نفس الفيلم ونفس الفكرة بس يبقى اسمها الفرح ....وسوقك مشي لأسباب كتيرة مش منها انك عامل سيناريو متماسك أبداً أبداً ...
تعجبك اللعبة فترمي في وشنا فيلم ساعة ونص ...بكل عبطه ومشاهده اللي شبه سينما الاربعينات وشخصياته العبيطة اللي مالهاش رجلين ولا حد عارف هي كده ليه ...
وتاني ينقذك سامح وبراعته ...وتمثيل ماجد الكدواني ( تاني ) وباقي النجوم اللي اراهن اذا كانوا هم نفسهم فهموا طبيعة شخصياتهم ...
وخطبة الجمعة والنصايح والزعيق في الودان شغّال ...خاصة في اخر الفيلم زي ماعودتنا ...مرة الكباريه يفرقع وكل اللي فيه يموتوا .... ومرة الفرح يبوظ ومرة القطر يتقلب وهكذا
ونخرج من الجامع ( قصدي السينما ) واحنا مش فاهمين انت كنت عايز ايه بالظبط ...وبتموّت الناس بناء على أي ذنب ارتكبوه يعني ...
وعادي زي مابتسرق تيمات ومشاهد مستهلكة من الافلام القديمة ....يومها سرقت فيلم كامل ( روائي قصير) من مخرج شاب عملت منه شخصية كريمة مختار
وطبعاً كملت في خطبة الجمعة بتاعتك اللي محدش بيبقى عارف ولا فاهم انت عايزنا نعمل ايه ...
أخيراً أتحفتنا بفيلم الليلة الكبيرة اللي للأسف ضيعت من عمري أكتر من ساعتين وانا بشوفه امبارح ...
والمرة دي للأسف وسعت منك ع الآخر
رسمت شخصيات أعبط من اللي فاتت وحبكة درامية فاشلة وفي منتهى السذاجة
فين الصراع في الفيلم ؟ هات لي شخصية واضحة وتصرفاتها مبررة كده ؟
وفين مشكلتك ...؟ الأرض اللي عليها المولد ..؟ جبتها ازاي وخدمت عليها من أي اتجاه ؟
بلاش ...ايه علاقة شخصياتك ببعض ...يعني المفروض مثلا كلهم مختلفين وبيتقابلوا في نقطة تماس واحدة ولا بيفضلوا كده للآخر ولا علاقتهم انك انت اللي كاتب الرواية بتاعتهم ولا ايه ؟
ومنين جات لك فكرة ان عمرو عبد الجليل يتجوز بنته في اخر الفيلم ؟ من أي فيلم عربي قديم في التلاتينات خدتها ؟
وليه التصرفات العبيطة من وفاء عامر مع بنتها ؟ كانت عملت ايه يعني وموتتها في الآخر بأي مبرر درامي ؟ وأيتن عامر طيب ..؟ ايه يعني الدور ده ...؟ منقبة ...وزعلانة ومقهورة طول الفيلم ...طب اتعب نفسك وحط سبب لقهرتها ودورها الحزين حزن السنين ده
يعني فهمنا طيب ليه قلبت بعد شوية وراحت للقواد ؟ بتنتقم منك ولا من نفسها ولا من المشاهدين ؟
وأحمد رزق ..؟
ايه ...؟
شخصية ماجد الكدواني في فيلم كباريه بلعناها بالعافية كرامة لماجد والمصحف ...بس انت واحمد رزق زودتوها ..يافاجرة يافاجرة يافاجرة ...عرفنا ياعم من أول مشهد انه متعقد من أمه ...وبعدين ...؟
يعني هو كان مجنون ولا متعقد ولا شخصية جاية على البيعة ولا سبتوا احمد رزق يمثل ارتجالي ؟
والله بنزعل على الناس الجميلة الطيبة اللي بتشتغل في افلامك ...صبري فواز وعمرو عبد الجليل وزينة ولطفي وايتن ووفاء عامر ووائل نور وسيد رجب
وبنزعل على أجواء المولد العظيمة اللي انت دخلتها وطلعت منها علشان تغيظنا بس ...
كفاياك ...احنا ياعم آمنا بأفكارك ونصايحك وفهمنا مواعظك العظيمة ....إنزل بأه وكفاياك كتابة أفلام من النوعية دي
آه كنت هانسى ...الأعمال دي كلها انتاج ال"حاج " السبكي
من الفيلم
من الفيلم
---------------
ذكريات .....فراخ اخوانية فاسدة
في اسيوط سلسلة سوبر ماركت مشهورة جداً ...( نهاية الثمانينات ) يملكها مجموعة من قيادات الاخوان بالمحافظة ...وأغلب فلوسها كانت بتاعة الاخوان الهربانين في السعودية واللي لابدين في الدرة ....كانوا مشهورين بشوايات الفراخ اللي كانت اختراع جديد أيامها ...ويبيعوها بسعر رخيص جداً ...بالصدفة قابلت خالد ...مواطن خريج تجارة...كان بيشتغل ويتر في فندق سياحي ....وكان قبلها موظف في السلسلة دي...
الشاب الجميل اللي كان رايح يشتغل معاهم علشان بتوع ربنا اكتشف بعد فترة انهم بيشتروا الفراخ المجمدة بكميات كبيرة برخص التراب...
ولما حاول يفهم اكتشف ان الفراخ دي منتهية الصلاحية ....وفعلاً برخص التراب ...بتتباع كزبالة هتترمي.....
كانوا الإخوة اللي دقونهم شبرين بياخدوا الفراخ دي ويرموها في احواض مليانة كلور ...وبعدها احواض مليانة توابل وتوم وبصل
تتساب فيها الفراخ ساعة وتطلع على الشوايات ....علشان الغلابة ياكلوها لأنها على قد فلوسهم
خالد قرر عدم المشاركة في الجريمة دي ...قلع هدوم الشغل ومشي في الفجر وريحته كلها كلور
وراح بلّغ الشرطة وقال لهم على أماكن المخازن بالظبط ...ومحصلش أي حاجة...
----------------
----------------
------------------
راجل لطيف ومسلّي
كل مايظهر أو يتكلم بينشر البهجة حواليه ...خاصة انه عفوي ومباشر واللي في قلبه على لسانه ، وهو قلبه ابيض كما هو واضح ومش مدي خوانة ...
يعني مفيش اي فرق عنده بين انه يكون بيتكلم في مؤتمر صحفي وبيتصور فيديو او بيتكلم اثناء احتساء الشاي ساعة عصرية قدام البيت
الواحد بقى بيستنى كل يوم يتفرّج له على حاجة جديدة من مفاجآته اللي بتبهج القلب وتحرّض على الضحك ...سواء كان بيتكلم عن اسرائيل ولا عن الست المصرية المثقفة علشان اخترعت المسقعة والبيض بالحمص ولا عن تصدير الكلاب
آخر فيديوهاته كان في منتهى الجمال ...لما راح يزور مركز لرعاية الأيتام بعد بلاغات عن تعرضهم لاعتداءات ..ورغم ان الزيارة والموضوع كله نكد ..إلا انه لم يحرمنا متعة الضحك من القلب وهو بيكلم طفل صغير ومش مركز بيقول ايه ...وبيقول للطفل انا جيت كام مرة المركز ...رد قال له الله اعلم ...قال له يابني افتكر ...يابني عد كام مرة مش انا جيت مرة الصبح ومرة بالليل ؟
----------------
ليالي مؤمن المحمدي
عندي الف سبب للكتابة عن مؤمن المحمدي ...أهمها إنه صديق عمر وزميل رحلات كفاح وشقا ...لكن السبب المرة دي يتعلق بليالي قريش ...الموسوعة التاريخية العظيمة اللي مؤمن شغّال عليها من فترة وصدر منها الجزء الأول ...
هو يومياً تقريباً بينشر ليلة منها على حسابه في الفيس بوك ...بسبب الليالي وطريقة مؤمن المبدعة السلسة في الكتابة بقيت بستنى كل حلقة بلهفة طفل صغير على حدوتة بتفتح قدامه بوابات عالم ساحر مبهج شبه الالعاب والكارتون ...
قد تختلف أو تتفق مع الطرح الموجود في الليالي ...وربما تاخد موقف مضاد على خلفية قناعات بكتب وحكايات قديمة ...لكنك أبداً مش هتقدر تفلت من الوقوع في أسر لغة المحمدي ومنهجه ...ولا المشاهد اللي بيرسمها كأنها شريط سينما بيمر قدامك ..فتعرف وتفهم وتنبسط وتستنى المزيد
ليالي قريش عمل تاريخي عظيم ...صاحبه كاتب ومفكر كبير وشجاع قرر انه يخوض معركة كبيرة مع اطنان من المعرفة القديمة المزيفة ...مع ملايين من الناس دماغهم عبارة عن مخازن كراكيب مليانة تراب ...علشان المعرفة وبس .
هو كمان أهم مؤرخ موسيقي عربي ...ومرجع ممكن تسأله على أي أي حاجة لها علاقة بالغنا من حفني احمد حسن للأندر جراوند
انا مجبتش سيرة رائعته ( كل العواطف ) واللي لايمكن تتنازل عن انك تسمع تفاصيلها على لسانه وبطريقته ...وهو بيستفتح الكلام بكلمة : بص ...ويسكت شوية وبعدين يكمل ..
اضغط هنا لمشاهدة الملف بالحجم الكامل