مها بهنسي تؤكد خبر إيقافها عن العمل: المعركة اللي ضدي سياسية وليست بسبب تصريحات

_ أكدت الإعلامية مها بهنسي، المذيعة بقناة "التحرير"، خبر إيقافها عن العمل من جانب إدارة القناة، مشيرة إلى أن الإخوان توعدوها بالتحرش والاغتصاب.
مها قالت، على حسابها الخاص على موقع "الفيس بوك"، مساء اليوم، الأربعاء: "المعركة اللي ضدي سياسية، وليست بسبب تصريحات بدليل أنهم نسيوا الجناه والمجني عليها ومسكوا في كلمه غير مقصوده على الهواء، ولكنني لن اضعف و سأظل أحارب كل من خان مصر، وسأظل أدعم كل مؤسسات الدولة من جيش وشرطه وقضاء".
وأضافت: "ولازم تفهموا أن الحرب الجايه هتكون ضد نساء مصر علشان شلنا أرواحنا على أكتافنا وأنقذنا البلد من الخونة والإرهابيين بنزولنا في استفتاء الدستور وانتخابات الرئاسة، فكر لو لثانية مش ممكن أكون أنا صح حتي لو 1% وفعلاً تصريحي (الشعب مبسوط خليه يهيص) كان على فرحة الناس مش على واقعة التحرش، والأغرب أن الناس اللي قال أيه بيدافعوا عن الستات اللي بيتم التحرش بيهم جايين الصفحة يشتموني ويتوعدوني بالتحرش والاغتصاب علشان بس تفهم أنهم بيحاربوا شخصي لدوري في محاربتهم، وكشف حقيقيتهم وطبعا أقصد الإخوان والطابور الخامس".
وتابعت: "طيب فكر كمان تانيه, واحده مؤيده للجيش وللسيسي وانتخبت السيسي ولم تتوقف عن دعمه (اللي هو أنا) هقوم أفرح في ست زيي مؤيده للسيسي زيي نازله تحتفل بفوز السيسي زيي أن كلاب سعرانة اتحرشوا بيها، أي منطق وأي عقل يصدق الكلام دا.. أحب اعتذر لكل مرأة و رجل تأثروا بالفيديو والتصريح غير مقصود نهائياً ومن الطبيعي أن أي حد عاقل لا يمكن يصدق أن مرأه تؤيد التحرش".