ليه الناس دايما ظالمه الفيس بوك والموبايلات...ومتخيله أن الحاجات دي سبب تخلفنا وتأخرنا !! ليه محسسني اننا قبل الموبايل وقبل الفيس بوك كنا على وشك ندب علم مصر فوق سطح القمر...كنا خلاص هنتأهل لكأس العالم 98... كان الجوهري خلاص هيغير الخطه ويهاجم ويسيبه من موضوع العشر مدافعين ده... منازل القاهره كانت على وشك تفعيل نظام الخلايا الشمسيه لتوليد الكهرباء... يا جماعه احنا السبب... لو مكنش فيه فيس بوك كنا هنفضل زي ماحنا...بنتفرج على التليفزيون الحكومي اللي كل هدفه كان يقول للناس متنزلوش تستحموا في الترعه... ادي ضهرك للترعه... تخيل تليفزيون دوله بينصح شعبه انهم ميستحموش في ميه وحشة...فمبالك بعقليه الشعب ده ايه ؟! كان زمان أي اتنين بيحبوا بعض بيتكلموا على التليفون الارضي... وكل شويه يقوموا يطمنوا أن مفيش حد رافع السماعه من أوضه تانيه عشان يسمع هما بيقولوا ايه قبل الفيس بوك كنا بنقعد في البلكونه نبص على اللي رايح واللي جاي كنوع من انواع التواصل الاجتماعي...ننزل نجيب دره وترمس.... نجيب شريط فيديوا لفيلم لسه نازل في السينما مبقالوش سنتين ده اللي هو حاجه جديده فحت يعني ونتفرج عليه ونضحك العيال الصغيره كانت بتتفرج على سبيس تون...وحلقات الكابتن ماجد وماوكلي.. لحد ماجلهم هطل...دلوقتي بيلعبوا كاندي كراش ساجا وصاب واي...وعندهم هطل برده الشباب كانت بتتصل تعاكس على التليفون ومبتزهقش ويوم ما حصل ثوره في عالم التكنولوجيا واخترعوا الاختراع اللي اسمه "اظهار رقم الطالب وعملوله اشتراك " العيال بقت بتعاكس من كباين ميناتل... دلوقتي بيدخلوا في جروبات...ويبعتوا فريند ريكوستات...و Pokes والموضوع بقي الطف من زمان بكتير البنات بدل ماكانت بتشيل صور زمايلها في البوك بتاعها أو المحفظه...بقي بيتصورا سيلفي على الفيس "بوك" زمان لما اتنين كانوا بيفركشوا كان يبعتلها حاجتها وصورها والبوماتها ودباديبها على خمس مرات للبيت بتاعها..دلوقتي بيعملوا لبعض كروب من الصور...و أن فريند وبلوكات بعد مايفركشوا ب دقايق زمان كانوا بيتقطع نفسهم عشان يسألوا على عريس متقدم ويلفوا على اصحابه وجيرانه وحبايبه وتضيع وقت السنين...دلوقتي بتدخل على الاكونت بتاعه...تلاقيه حاطط Cover photo ديني ومشير 2 استيتس لمصطفى حسني على فيديو خطوات الشيطان لمعز مسعود...فتوافق على طول...اما بقي لو لقيته مشير حاجه لسما المصري...وكيم كارديشان...فبتوافق برده...هو فيه عرسان اليومين دول اصلا احنا اللي بنضيع الوقت...مش الفيس بوك والموبايل...احنا المسؤولين عن هيافتنا... احنا كمصرييييييييييييييييييييييين "بصوت يوسف شعبان " شعب مش مفيد