لاشيء

بيسخنوا ..
و اللعب لسا مبتداش ..
في البدء .. كان مفهاش غير كورة نفخ .. و متسع
شاهد علي لعب اللي عاش ..
ع الأرض قبل ما يتولد ..
و بصرخته .. خارج من الضيق للوسع
و كأنه صفارة حكم ..
راح يبتدي عمر النزال ..
لا شئ – لا شئ
طعم التعادل زي قشاي ة لغريق
و اللعب لسا في أوله ..
طفل و بيحبي
لسا في بدء الطريق ..
مستغرب ان الطير علي بعد السما ..
بيطير يدور !
ازاي ؟! ازاي اذا يخلص ضلام راح يجي نور ..
ازاي كدا كل الكبار ؟ .. صبحمْ كبار ؟
ازاي تطفي المية نار ؟
لسا السعادة ف فرقته .. و الضحك في وشة البرئ
حارس عرينه باقتدار ..
و الخصم بيدافع تمام ..
الخصم خايف م الولد !
خايف ليتغلب عليه رغم الصغر ..
خايف صباه ..خايف غناه .
و الرسم في ضل الشجر ..
خايف تطول الكورة في رجل الفريق ..
و يطول معاه حب الحياة
عيل صغير يا بجم !
عيل صغير يا بجم .. لسا مكنش الهم جاه
واحد - لا شئ
جابه فريق الخصم ف شباك الولد ..
و نخاف نعيده لحسن الجمهور يخاف !
و نعيده ليه ؟
جمهور قراري و ياما شاف !
راح تفرق ايه تفاصيل هدف ..
ف عيون مشاهد شاف كتير أجوان كدا
شاف نهنهة أطفال كتير و عيال كدا ..
علي لعبة كانت نفسهم .
او غية كانت حلمهم ..
رفضوها قطعا أهلهم علشان قانون الصح قال ..
“,” أحلام عيال “,”
بس الخلاصة إنها .. غفلة بسيطة و لخبطة في تيم الولد ..
او زي ما الكوتشات تقول “,” لأن الواد كبر “,” ..
لكن فريق الخصم لسا في ملعبه ..
و الفرق لسا قليل و ممكن يتجبر !
إتنين – لا شئ
كان وقتها نازل لتيم الخصم لاعيب محترف ..
حبْ الولد ..
و الحب في عرف الولد شئ مختلف .. نازل لخصمه مش معاه ..
اثر نزوله ع النتيجة بجون كمان ..
رغم ان عمره ألف عام .. و الواد و قلبه لسا خام ..
لكن قانون اللعب بيقول “,” كملوا “,” ..
و الواد بيبكي الحب دا .. يبكي اللي كان نفسه يكون
و الناس تهلل .. و القانون هو القانون !
تلاتة – لا شيء
و الوضع أصبح مزري للغاية بقا ..
لاعيبة الفرقة اللي كانت تسنده .. صبحت عدم
مش قد أهوال الشقى ..
و الخصم دافع للحكم ! ..
و الواد بطوله تحت وابل م الهجوم !
من دا ل دا .. و من دا يروح جاري ل دا ..
و الوقت عدّى و الصحاب صبحمْ عدا ..
جمهور فريق الخصم يا سامعين .. أكم ؟
بيشجعوا خايفين فريق الواد يقومْ ..
أما بجمْ !
راح يعمل ايه ناشئ جديد ؟
قدام كتيبه م النجوم ! و الأرض .. حتي الأرض وقفت جنبهم !
جونه بيوسع له أما جون الخصم ضاق !
بيسخنوا للاشتياق .. و حيلعبوا فوق العدد !
مسكين فريقك يا ولد !
أربعة – لا شئ
خمسة- لا شئ
سته – لا شئ
سبعة – لا شئ .
أجوان كتيرة جت كمان بتعد أحزان الولد
و العمر باين له اتسرق !
و الصفر في خانته رشق ..
كما بقعة سودا ف صفحة بيضة م الورق ! ..
و الواد بيبكي عمر عدّى ف ماتش زور !
و الماتش سايب ضحكة في وش الحضور ..
تصقيفة حلوة يا جدع .. للي كسب
أما الولد ..
سيبوه يهاتي إوعاكوا حد يعبره ..
بيقولوا “,” بيموت اللي ينقذ حد هربان م الغرق “,”
بيقولوا “,” بيموت اللي ينقذ حد هربان م الغرق “,” !