أحلى من الروتين مفيش!

لو سمحت عايز أختم الورق ده...
يا ابني يا حبيبي انت متلهوج ليه.. حد يختم ورقه الساعه 8 الصبح داحنا بنقول يا هادي..استهدى بالله...
طيب آسف....
اهو الساعه 9 يا أستاذه ممكن الختم..
يا ابني الواحد يا دوبك بيفطر لقمة يشد بيها نفسه علشان يقدر يكمل وننجز أعمالكوا، دلوقتي أزور واموت من خضتك دي..
انت خاطب ولا متجوز.. أنا عندي بنت أختي قدك كده..
مرتبط يا حجه مرتبط.
استغفر الله العظيم ليه كده بس؟!
ليه كده إيه! طيب آسف..
الساعه 10 بقا والدنيا فل ختم بقا... يا ابني يا حبيبي سؤال لما بتفطر بتعمل أيه بعدها..
أنا مبفطرش أصلا..
علشان كده متلهوج.. بص الفطار بعديه شاي.. كوباية شاي تعدل الدماغ...انت مبتشفش الشيف شربيني..
ماله الشيف شربيني باللي إحنا فيه دلوقتي؟!
ملوش
طيب معلش.
الساعه 11 فين يا جماعة طنط اللي كانت هنا..
راحت تتوضى علشان الصلاة با ابني..
الصلاه الساعة 12 يا جماعة.
يا ابني مهو يا دوبك تلحق تتوضى وتصلي الضحى وركعتين قبل الظهر.. بركة يا ابني.
طيب أنا غلطان.
الساعه 1 الختم بقا يا طنط...أبوس إيدك..
وريني كده الورق..
اهه الحمد لله..
بس ده ناقص إمضاء عميد الكلية، وورقة دمغة من البوسطه جيبهم وتعالى بكره..
طب ما كان من الصبح..
معلش بكره بقا..
في عالم موازي بعد 12 سنة..
ممكن ختم هنا
يا ابني إنت متسربع ليه...الاختام بقت "أون لاين" والسيستم مهنج ما ده عيب التكنولوجيا..
طب هو سلك الكهرباء ده شغال..
آه طبعا.. اتفضل.
تمزمز في كوباية الشاي وتقول "غلبان ارتاح".