قوم اطمن على أي حاجة!

شعب الجمهورية بصراحة راقب عن كثب وبقلق وحاجات كتير متلخبطة، خبرين مفادهم إن الجمهورية خلاااااااااص دخلت مرحلة العبث الكوني المستفحل والمستحكم، وفي الطريق للخراب المستعجل.
يعنى إيه بمنتهى البساطة قطر يضيع ويختفى لمدة 8 سنين؟؟؟
يعني إيه- تانى- قمر صناعى يختفى من الفضاء؟؟
بس بصراحة أكتر بقى، فى ناس فى الجمهورية مش مندهشة ولا مستغربة، بعد سماع أخبار مماثلة عن سرقة ونش تابع لوزارة النقل من مكان عمله،
أو سرقة كوبري مشاة في الغورية بشارع الأزهر فى عز الضهر يا مؤمن، أو سرقة 150 كيلومتر من قضبان السكك الحديدية.
ناقص نصحى الصبح نلاقى الهرم مش موجود، وأبوالهول اتخطف واللى خطفوه طالبين فدية، وهو بيصوت على التليفون ويقول إنقذونى هيدبحوني ياماما!
أنا سامع حد من الجمهورية بتاعتي بيناديني- بما إنى رئيسها- وبيقول لى ماتقوم تطمن- مش على فلوسك بس- لكن اتطمن على أي حاجة ياعم انت.