دليلك لخطوبة ناجحة

بعض الشباب لما بييجي يختار بنت عشان يتجوزها بيقعد بقى يعمل فيها مفتح وناصح ويتقمص دور كرومبو ويختبر أخلاقها ويقعد يسألها عرفت حد قبله ولا لأ؟ ويتكلم عنها كأنه بيشتري توكتوك.
بص يلا، البت دي أصلي والعداد بتاعها لسة زيرو والشاسيه مية مية.
أنا بصراحة لما بشوف كده بافطس من الضحك، ليه بقى ياعزيزي الحمار الصغنن أسئلتك التافهة دي البنت متدربة على الإجابة عليها من وهي في اللفة يعني لو صايعة هتعرف تلبسك القرطاس المحترم عارف ليه عشان انت سبت الأسئلة المهمة:
إسألها كده لو جيتلك يوم وانا مفصول من شغلي وما فيش في جيبي جنيه هتستحمليني ولا هتروحي لأهلك؟
طب إسألها لو تعبت أو جرا لي حاجة هتقفي جنبي ولا لأ؟
طب إسأل نفسك لو هي عدادها زيرو بس دمها يلطش ومتمسكة بالنيش أكتر ماهي متمسكة بيك ساعتها بقي هتعمل إيه بالعداد الزيرو يا قفل؟!
البنات حبايبي نفس الكلام تقوليلها فلان عريس تقولك عنده عربية شقته فين بيقبض كام أهم حاجة ماقعدش مع امه.
ياست الهبلة إسألي اخلاقه إزاي؟
هيحترمك ويصونك ولا هيقضيها عطّات على بيات اعرفي لما بيتعصب بيبقي إزاي ماهو اصله لو اتعصب عليكي وادالك بونية بوظ خلقتك عربيته وشياكته مش هينفعوكي في حاجة
الصبر يارب..