هي عرفت إزاي ؟

تبقى قاعد في حالك ومركز وعمال تكتب حاجة أو بتفكر في حاجة والدنيا صيام بقى والواحد دماغه مش مستحمله وهوبا.. تلاقي صوت ميكروفوني مضخم داخل من الشباك وراشق جوا عقلك على طول.. ما هو الواحد من 15 ساعة مأكلش ونسبة السكر في الدم بقت تحت الصفر وعلشان كدة الودان مبتشتغلش اوي يعني فالصوت بيدخل مباشر على العقل..
حسنة لله يا مسلمين يا موحدين يا صايمين..
ايه ده بجد ؟! انا مش مصدق دا صوت ميكروفون.
من هول الصدمة جريت على البلكونة ابص واتأكد... وبالمناسبة احنا عندنا بلكونة شرحه آخر حاجة !!!
لقيت واحدة ست هدومها زي الفل وتوزن يجي 150 كدة على الأقل ومعاه ميكروفون من بتاع الشرطة اللي كان في فيلم رامي قشوع لما صلاح قابيل كان بينادي عليه قبل القطر ما ينفجر.. معاها ميكروفون زي ده بالضبط
وبتشحت..
وقفت اتفرج واشوف بقى المسلسل دا اللي ربما يطلع اسهل من ام مسلسلات السنة دي في رمضان اللي كلها ساسبنس وتشويق وجري وهرت
بقت الست واقفة أو بتمشي ببطء كدة وتيجي بنت صغيرة لسة متجوزة من كام يوم وتديلها اللي فيه النصيب (خمسة جنيه انا شوفتها من فوق يعني ) والست تروح قايله لها.. ربنا يخليكي ويهدي سرك يا بنتي.. السؤال هنا بقى
مش مهم جابت الميكروفون منين وبكام وليه ؟
وايه اللي جاب في دماغها الفكرة دي اصلا ؟
وهي منين ولبسها نظيف كدة تبقى يعني احسن من مفيش ؟
لالالالا انا اللي شاغلني بصراحة... هي عرفت ازاي أن البنت اللي اديلتها حاجة لله انها متجوزة من كام يوم قبل رمضان ؟؟
ازاي ؟؟
وكمان تدعيلها أن ربنا يهدي سرها ؟؟؟
يعني عرفت كمان أن البنت دي اتخانقت من كام يوم مع حماتها ؟؟ طيب دا احنا بس الجيران اللي كنا عارفين أن عندها مشكلة في البيت ؟؟
يكون حد قالها ؟؟؟ ممكن ؟
طيب حتى لو حد قالها ؟ هي عرفت منين أن هي البنت اللي بتديلها الفلوس دي ؟؟
حاجة تحير..؟؟ انا رأيي أن الست دي ممكن تكون تعرف مكان جثة سيد نفيسة ؟