أختك أحلى حاجة في الدنيا

- وانت في البيت مفيش غير أختك هي اللي بتداري عليك وتفتحلك وانت جاي متأخر، وأحيانا.. قصدي غالبا بتسلفك كل فلوسها.
- وانت في المدرسة وفي الفسحة بتأخد منها أحيانا سندوتش وأحيانا بتروح لها الفصل بتاعها تجيب علبة الهندسة بتاعتها أو الألوان وعمرها ما قالت لا، مش علشان هي أختك الكبيرة، لأ علشان بتحبك.
- وانت في الثانوية تاخد كل فلوسها بحجة انك هاتجيب كتب خارجية وهي أكثر واحدة عارفة انك هتخرج تتصرمح ومع ذلك بتديلك كل اللي معاها.
- وانت في الكلية.. بدون مقدمات بتلاقيك ناطط على المدرج بتاعها في كلية الآداب، وراشق في وسطها ووسط صحباتها علشان تطلعلك إن شا الله بشلن..
- وانت قاعد صايع بعد ما خلصت الجامعة.. ومش لاقي أي شغل وكاره الدنيا باللي فيها... تلاقيها بتصحيك الصبح وتطبطب عليك.. وتعملك فطار وشاي وتبتسم في وشك وتهرج معاك وتفتح نفسك على الدنيا.
- لما تلاقي أي شغل أن شاء الله صبي قهوجي وقلبك يرفرف من الحب لما تشوف زكية المنفية اللي شغالة في مصنع الإزاز بس انت متخيلها مهندسة علشان اللبس والمكياج.. وتروح تفضفض معاها وتضحك في وشك بهدوء وتوصلك الموضوع بالراحة لحد ما تقتنع انك كنت حمار.. ومش فاهم حاجة.
- حتى بعد ما ابن الحلال ييجي وياخدها ويطير وتبقى زعلان انها هاتمشي من البيت.. تلاقيها بتحضنك وتبوسك وهي بطرحة الفرح زي ما تكون بتودع ابنها الرضيع مش بغل عنده 26 سنة.
- وبعد ده كله وبعد ابوك وامك ما صرفوا عليك دم قلبهم واستحملوا جعيرك في البيت ليل ونهار واصحابك الفشلة زيك والشاي والقهوة والفاكهة وتجي تغضب وتسيبلهم البيت تروح راشق عندها كام يوم على ما جوزها يجي من شغله آخر الأسبوع.
- وبعد ده كله تيجي تقولها ملكيش ورث في بيت ابوكي ولما تتعب تبقى آخر واحد بيسأل عليها.. اختشي على دمك وبوس ايديها بعد ما تبوس ايد امك ورجلين ابوك...