تخيل لو الكعبة كانت في مصر مش في السعودية!

- كنت هتلاقي أتوبيسات في الموقف بتنادي "كعبة -حرم" بنفس نبرة الصوت بتاعة "جيزة - هرم" بالظبط!
- مش بعيد تلاقي في رمضان الكعبة متعلق من فوق عليها سلك لُمض بتنور عادي جدًا!
- لا وممكن يخلولك الكسوة قماش الخيامية.. عادي جدًا برضه!
- سور الحرم من بره هيبقى عبارة عن بوسترات هل صليت على النبي اليوم؟
- مش هنخلي حد غير المصريين يعتبها.. ببساطة عشان مش هيبقى في مساحة أصلا لغيرنا!
- وسط الطواف والسعي عادي جدًا إنك تسمع السبحة السحرية.. ليك وليا.. سبحة يا أبلة؟.. سبحة يا أستاذ؟
- وعادي جدًا كمان إنه يوزعهم عليك ويلف في الطواف ويجي ياخدهم منك تاني D:!
- الكعبة هتتفضى كلها طبعًا لما "حد مهم" يحب يعمل عمرة أو حتى يصلي ركعتين تحية مسجد.
-الحرم هيقفل بعد كل صلاة.
- الأهالي الشرفاء هيعلقوا بانرات على بوابات الحرم زي: ممنوع دخول الإخوان الإرهابيون - خير بقاع الأرض لخير أجناد الأرض.
-الحمامات بفلوس.. لوكر الجزمة بفلوس.. مية زمزم بفلوس.. المراوح بفلوس.. القعاد بفلوس.. مسك المصاحف بفلوس..
هات قناة السعودية الأولى.. بُص على الكعبة كويس وأحمد ربنا إن الكعبة مش في مصر!