رمضانا يغلب رمضانكو

رمضانا وجمال رمضانا ياشي ياشي..ياااشي من منكم ماعرفهاشي...ومن ؟؟ الخاطبة.ياسلام على حرب اطاليا ساعة المدفع وبمب مرة تصيب ومرة تخيب..وطبعا توزيع الثلج على الجيران اللي ماعندهمش التلاجة الايديال الفظيعة أقولكم إيه ولا ايه على رمضانا وجماله..ابتدي معاكم من السحور وطبلة المسحراتى واصحى يا سنيه وساعدى ماما هنيه وياللا يا وائل ويا محمد ونعيم واصحا ياعم سلطان ماتعملش عيان ونجري نشوف المسحراتى ونحضر طبق الفول الزبدة المدمس على السخان وخانق ريحة البيت مع الخيار والزبادى وماتنسيش تعلق على براد الشاي شريب بقا وساعات البراد الازرق وقبل ما تلقم الكوباية شوب عرق سوس والوالده حاطه ايدها على قلبها وهى شايفاك بتقلد عم حسين وهو بيشخلل ويقول شفا وخميرة يا عرق سوس وينزل الولاد بالكورة مع ولاد الحته العترة الحريفه واحلى كورة شراب بالغرة والخيط ملفوفه ولا ميسي ومارادونا ويشقشق النهار يطلع الصاحى يصحى اللي نام يروح شغله واللي هايرجع بالكنافه والقطايف مع توصيه من الام خاللي بالك سيبها تتهوى علشان ماتعجنش وماتنساش السودانى وكيس الطرشي البلدى العايم في البحر الأحمر اما ست الكل تقوم تنقع البلح من بدري وتفصص التوم لزوم طشة الملوخية والاكل بزياده واعملي حساب عم أحمد نبعتله طبق راجل وحدانى ودقي ياساعه وهاتيلنا عمو فؤاد رايح يصطاد ويقول الفزورة اللي اشترينا ورق فلوسكاب نكتب فيه الحل ونغنى ونقول وياه وبعده طبق اليوم والراجل دا هايجننى وحالة الطوارئ تبدأ قطع السلطه ورص الكوبايات وبسرعه يا حماده انزل هات الادان وتعالي والف ليله وليله قصة كل ليله واحكى يا شهرزاد..وهات الفوانيس والكبريت من ورا ماما واقعد ونادوا على اصحابكم وكل واحد يستعد اللي فانوسه هايسخن الأول يجري وهانجري وراه وهانلعب كهربااااااا شد الكوبس وبالليل بشويش نتفرج على بوابة الحلوانى مع حته كنافة وكوباية شاي وسمعنا ياعم النقشبندى واطفا ياعم الفانوس ونااااااااااااام...رمضااااااانا اطعم من رمضانكو.