حصاوي يفتخر بنفسه

(المواطن الغلبان حسن حصاوى يغشي عليه من حين لأخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه).
(حصاوي بالمقهى يحضر نفس الشاب الذي جاء في الأسبوع الماضي وسأله عن صديقه أو أستاذه المثقف الذي اختفي من فترة)
الصديق الأستاذ صاحبنا لسه ما ظهرش برضه ؟.
حصاوي قصدك صاحبك المتسقف ؟ لا لسه. من ساعة انتخابات الرئاسة ما خلصت
ما سمعتش عنه حس ولا خبر.
الصديق بس دي حاجة تقلق.
حصاوي ولا تقلق ولا حاجة. تلاقيه بس مكسوف.
الصديق ما فيش حاجة تخليه يتكسف.
حصاوي طيب يبقي إيه اللي يخليك تقلق؟
الصديق مش جايز يكون حبسوه؟
حصاوي ( مفكرا) والله مش بعيد.
الصديق يعني أنت معايا؟
حصاوي طبعا.أنا سمعت عن ناس كتير أهاليهم منعوهم من الخروج عشان ما يجبلهمش العار.
الصديق عار إيه ؟ أنا خايف يكون حد خطفه أو اعتقله.
حصاوي ليه هو عمره ما كان ضد الإخوان أو السلفيين.
الصديق أنا بتكلم عن السلطة. ممكن تكون السلطة هي اللي اعتقلته.
حصاوي والسلطة تعتقله ليه؟
الصديق لأنه كان مع حمدين بس مخبي وما كنش بيظهر دا.
حصاوي حمدين مين ؟
الصديق حمدين صباحي يا أخي.
حصاوي أيوه أنا سمعت الاسم دا قبل كده. بس فين ..فين ؟
الصديق اللي كان مترشح قدام السيسي في انتخابات الرئاسة يا بني آدم.
حصاوي أنت متأكد أنه كان نازل قدام السيسي؟
الصديق طبعا. أنت بتستهبل؟ أمال كان نازل قدام مين ؟
حصاوي أنا كنت فاكر أنه مع الكتلة اللي بتنافس السيسي وعشان كدا أبطلوا أصواتهم في الانتخابات.
الصديق فيه حاجة أسمها يتنافسوا بأنهم يبطلوا أصواتهم ؟.
حصاوي طبعا بدليل أنهم خدوا أصوات أكتر من حمدين اللي طلع التالت.أنا فهمت دلوقت
بس. يعني حمدين دا كان نازل ضد المبطلين.وأنا راخر كنت بقول في نفسي
مش معقول كان نازل ضد السيسي.
الصديق أسمح لي أقولك أنك راجل حمار.
حصاوي تشكر كلك ذوق.
الصديق أنا مش بهزر. واضح انك طور لله في برسيمه.
حصاوي أستني. أنت بتسأل عن حمدين ومش لاقيه؟
الصديق أيوه.
حصاوي طب ما هو فيه خير عنه في جرايد النهار دا .أنت ما قرتيش؟.
الصديق أنا ما بقراش جرايد بتاتا.
حصاوي آه وافتكرت أن التليفزيون طلع صورته ع الشاشة أمبارح وهو قاعد وسط عشرات من شباب حملته الانتخابية.
الصديق غريبة ما حدش أداني خبر.
حصاوي مش بقولك مكسوف ؟.
الصديق حمدين ما يتكسفش أبدا.
حصاوي صح.تصدق في دي عندك حق. أصله ناوي كمان يرشح نفسه في انتخابات مجلس الشعب. تصور؟
الصديق يبقي برافو عليه.
حصاوي طب مش خايف من اللي أبطلوا أصواتهم يطلعوا برضه المرة دي وياخدوا أصوات أكتر منه يقوم يطلع الأخير؟
الصديق مستحيل.أكيد المرة دي هيكتسح.
حصاوي أشمعني؟
الصديق مش عايز أتكلم وأقول أن انتخابات الرئاسة أتزورت.
حصاوي هو أنت غششته؟ أقرا الجرنان تلاقيه قال أن الأرقام اللي أعلنتها اللجنة العليا للانتخابات ما كنتش حقيقية. ولا تعبر عن الواقع.وقال كمان ( أسقطنا مبارك فكسب الإخوان وأسقطنا مرسي فكسب الجيش)
الصديق برافو عليه.
حصاوي يعني هو اللي أسقط الإخوان ؟
الصديق مؤكد هو.
حصاوي وليه أمال ما أسقطش الجيش؟ وبعدين هو كان الجيش دخل الانتخابات؟
الصديق دا موضوع تاني لما يبقي عندك ذرة من الوعي هبقي أفهمك. وريني الجرنان اللي في أيدك.
حصاوي أتفضل.
الصديق (ويقرأ) ( وأوضح صباحي أن المواطن لم يعد يتقبل الكلام عن الثورات لاعتقاده أنها ضد متطلبات حياته اليومية من الأمن والأمان ولقمة العيش وأن المواطن بدأ يعتقد أن الثائر يقف أمام قطار التنمية.
حصاوي الله..الله دا غطب في المواطنين كلهم.
الصديق ( ودعا إلي التحالف مع تكتلات بشرط لا تكون مع رجال مبارك أو الإسلاميين بخلاف حزب النور السلفي.وأكد صعوبة الفوز بقائمة في الانتخابات المقبلة في ظل الظروف الحالية)
حصاوي ولما الفوز بالانتخابات دلوقتي صبعة. هيمشي في نفس السكة ويخشها ليه؟
الصديق تعرف أنك حمار؟
حصاوي آه طبعا عارف.
الصديق أمال فخور بنفسك قوي كده ليه؟
حصاوي أنا فعلا الناس اللي زيك سموني حصاوي.وأنا مش متضايق لأنهم هما مش عارفين سكتهم. لكن بذمتك عمرك شفت حمار حصاوي بيغلط في السكة ؟
( الصديق يغشي عليه )
لينين الرملي
629
هرش مخ
الأحد 29 يونيه 14
1 قلوبنا معاه
صرح مرسي أنه موافق علي الحوار مع النظام لكن الباشمهندز الشاطر يصر علي التصعيد.
المفروض بقي يفرجوا عن مرسي!.
19
2 يا تري؟
مسلسل جديد عن علاقة عبد الناصر وعبد الحكيم.يا تري هيفيد الطلبة الذين يدرسون التاريخ في
مدارسنا أم سيقول الحقيقية!!
19
3 الحزب الصالح
حزب النور يوزع الزيت والسكر وقوافل طبية لخدمة أصوات الفقراء.طيب ما فيش حاجة للنخبة
عشان تغطرش علي عدم التصريح للأحزاب الدينية؟ ولا خدوها بالفعل؟!
24
4 بالعكس
لو أن الحزب السلفي وضع شاشات لفرجة الغلابة علي كأس العالم وما قالش أنها حرام يمكن أن
يكسبوا الانتخابات بسهولة !
21
5 حزب الضلمه
كان أولي بحزب النور أن يدعو إلي استخدام الفوانيس بدلا من الكهرباء و السيارات بدلا من والتكييف والتليفزيون الخ وكل ما أخذوه عن الأجانب الكفار!
19
6 رمضان كريم
لماذا نشتري كل أنواع المأكولات والمكسرات والمشروبات ونأكل أكثر من أي وقت في شهر
الصيام؟! سؤال بلا إجابة!
18
7 خيال
إذا خفف الأثرياء والطبقات المتوسطة من الأكل الكثير والزينة الكهربائية في شهر رمضان تخيل
فقط. كم يمكن أن نوفره من المليارات؟!
21