اسم مراتك إيه!

مسمى مراتك إيه على تليفونك؟ طب مسمية جوزك ايه على تليفونك؟ الموضوع دا يختلف من شخص لتانى يعنى لو كانوا بيحبوا بعض والحب مولع في القلوب هاتلاقى (حبيبى...نور عينى....مراتى...حياتى...عمرى..) أو (اسم دلع).
أما بقى لو مخنوق منها وفى وظيفة معينة هي بتقوم بها معاه هايسميها على اسمها، يعنى مثلًا لو عاملها زى وكيل النيابة هيسميها (وزارة الداخلية) أما بقى لو رغاية أو نكدية يبقى (النكد) أو لو كانت بتتصل بيه دايما وتطلب طلبات هاتبقى (هات هات) ولو شكلها وحش (أم اربعة واربعين) وطبعا النغمة الموحدة (حاسس بمصيبة جيالى) !.
وفيه نوع تانى بقى بيحط اسمها وخلاص، وفيه بيسمى (أم فلان) على اسم أول مولود.
بس الغالبية العظمى بيسجل اسم مراته (الحكومة) انطلاقًا من أن معظم الزوجات مثل الحكومة فعلًا تلاقى الواحدة من دول بتلعب دور كل الوزارات وعندها قدرة تتقمص كل الشخصيات في اليوم الواحد.
أما الزوجة بقى مش كده بتسمى باسمه أو (أبو فلان) على اسم ابنها، وطبعا دا لو أصلا ماأخدش التليفون منها بحجة أن تليفونه باظ وطبعا هو ميقدرش يمشى من غير موبايل وانتى مش مهم وفى الحالة دى (سطو شرعى) على تليفونك ياغالية، وانتى ابقى قابلينى لو اخدتيه أو جابلك غيره أصلًا (اقولك إبقى اكتبى الموبايل في القايمة)!