كام وأربعين.. شعر ناصر محمود

كام وأربعين ؟
تلاتة ؟ .. تلاتة
بالتمام مقفولين
موصولين مفصولين
مش مهم
كلها لعبة سنين
واحنا فيها مكملين
قول آمين
ليه حزين ؟!
إنت كام واربعين ؟
( ....... )
الفرق بينا مش كتير
غنوتين ؟
كلمتين ؟
عيلين ؟
دمعتين يأس وخلاص ؟
قرصتين في القلب من أقربها ناس ؟
والعمل إيه يا ابن عمي ؟
نفسي أقول لك شد حيلك
ابتسم .. حبة حماس
مش هاخبي
الأمل غرقان في دمي
كل همي في الخلاص
والسنة دي الهم أكبر
العيال فعلا بتكبر
نفسي تحصل حاجة حلوة
قبل جيم أوفر ما تظهر
قول آمين
كلها لعبة سنين
واحنا فيها مكملين
بس عارف ؟ ..
ريحة العمر ف ديسمبر
شيء تقيل
مش كفاية ترش من أجدع مزيل
دنيا برد
والحاجات أقرب لبعض
السنين بواقي ورد
ألف جايز
ألف ممكن
ألف وعد
وف ماجور اعجن وخَمَّر
أي حد .. مهما عجِّز
ييجي يتسَنِّد يعَكِّز
نفسه يتشمر ويخبز ..
لقمة حلوة
سمرة ماشي
بيضة ماشي
أي طعم يقول ف حلقي ..
إني مش محتاج لحد
أي حد
ريحة العمر ف ديسمبر
متعبة فعلا بجد
هو ديسمبر يهل
وتلاقينا عريانين
لحمة حمرا ع الجريل
بص .. شم
يلا ناكل ودن بعض
غمزتين ع الحظ الاسود
ضحكتين ع الشعر الابيض
اقعد اقعد
ليه حزين ؟
إنت كام واربعين ؟
كلها لعبة سنين
واحنا فيها مكملين
قول آمين
اللي فات بيقولوا مات
كذابين
أنا صاغ سليم
يحصل إيه للحزن يعني لو قديم ؟!
اللي فات منا النهارده -
وبكرة نفتكره بوردة
اللي مات بيتنا القديم
بس فاكر كل كلمة ع الحيطان
عتمته وصوت البيبان
والجيران
حتى أبويا زي ما هو مهما مات
كذابين
أنا صاغ سليم
يحصل إيه للحزن يعني لو قديم ؟!
أصلها لعبة سنين
كلنا مستنيين
الميعاد ويا إيه ؟
ويا مين ؟
إيه يا عم ؟!
إنت جاي تشرح لمين ؟!
هي طبخة من سنين
تلهطوها بكلمتين
اقعد .. اقعد
إنت كام واربعين ؟
( ...... )
كل مرة وانت طيب
واللي لسة مكملين
طيبين .. طيبين .