خاص| سهير المرشدي: حنان مطاوع متعددة المواهب.. وبحس ربنا راضي عني لما بشوفها ناجحة

كشفت الفنانة سهير المرشدى تفاصيل اكتشافها لموهبة التمثيل في ابنتها الفنانة حنان مطاوع، وقالت في تصريحات خاصة ل"البوابة نيوز": "كنت حيرانة فيها؛ لأنها كانت بتحب حاجات كتير، وبتغير وتتنقل بين أكثر من هواية، مثلا الرسم، والعزف، وكذلك كتابة وإلقاء الشعر، فكانت منذ الخامسة من عمرها تحب الشعر، وحنان شخصية متأملة وكتومة، وهذه من صفات الشعراء، وكنت لما أشوف مذاكرتها من وراها؛ لانها كانت دايما بتعترض إن حد يشوف حاجتها، ألاقيها كاتبة شعر جميل وكلمات تبهر، فكنت دايما أقول لوالدها: أنا خايفة على حنان؛ لأنها مش مستقرة على هواية معينة ، لكنه طمأنني وقالي: لا دى هتكون فنانة شاملة ولازم تكونى فرحانة بيها، أما موهبة التمثيل لمحته فيها وهي عندها 12 أو 13 سنة، ولكن رفضت أنى أقولها عشان ما أشغلهاش عن الدراسة".
وتابعت: الموقف اللى شدتنى وخالني أخد بالي من موهبتها التمثيلية لما كنا راجعين أنا ووالدها من المسرح ، بعد عرض مسرحية النسر الأحمر ، وهى مسرحية قدمت خلالها عددا كبيرا من الأشعار ، ولكن توقفت فجأة أمام حجرة حنان لانى سمعت صوتا قويا يشبه صوتي يقول نفس المونولوج الذى قلته في المسرحية ، بلغة عربية وتشكيل سليم ، وتخيلت انه تسجيل ولكن فتحت الباب واكتشفت انها حنان ، وكنت في منتهى السعادة لان هذا المونولوج كان أكبر من وعيها ،فشعرت فعلا اننى اسمع نفسي ووقتها كنت في عز عنفوانى ، وكرم قالي شوفتى دى هتبقى حكاية ولسه.
وعن شعورها وهي تري نجاح ابنتها في مشوارها الفنى وتألقها في أداء ادوارها واعمالها قالت المرشدى :"بحس ان ربنا راضي عنى انى اشوف لحظة زى دى ، اشوف بنتى اللى هي امتداد ليا ولوالدها ، و اننا قدرنا نحطها على الطريق الصح ، وكان عندنا حق اننا نحطها على الطريق الصح ، لانها أهل ليه".