رحمة حسن: «امبارح بالليل وأنا ماشيه عضّني كلب ولسّه بنزف»

تعرَّضت الفنانة الشابة رحمة حسن لحادث بعد قيام كلب بعضِّها والهجوم عليها، حيث كتبت عبر حسابها الرسمى على موقع التواصل الاجتماعى والصور الشهير "إنستجرام"، قائلة: "مساء الخير، امبارح الساعة 11 بليل، كنت نازلة أجيب حاجة من السوبر ماركت جمب البيت، وكنت ماشيه على الرصيف، وكان فيه عربية بتركن جمبي عادي، فجأة الباب اتفتح، ولقيت كلب (جيرمن شيبرد) تقريبًا مَش متأكدة أوي، بيهجم عليَّ بكل قوته، طبعًا حاولت أجري، لكن للأسف الكلب كان قوي وشرس ووقّعني على الأرض، حاولت أقوم وأجري وصاحبته حاولت تشدّه، بس فك الليش بتاعه، وعضَّني عضة كبيرة وغويطة بنابه".
وتابعت: "صاحبة الكلب كتر خيرها أخذتني فورًا على مستشفى إمبابة، إدوني حقنة تطعيم الكلب، ولسه فاضلي 4 هاخدهم خلال شهر، بس المشكلة إن من امبارح الجرح بينزف دم كتير، وأنا طبعًا خايفة ومصدومة وتعبانه، وعندي تروما من امبارح، واللي واجعني أكتر أني مَش عارفه أتصرف إزاي" .
واستطردت: "خصوصا إني أكيد مَش عايزه الكلب يتأذي، بس كمان مَش عايزه أي إنسان كمان يتأذي ويتعض، ويتبهدل في الشارع زيي .. أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، امبارح صاحبت الكلب قالتلي متخافيش هو عض ولادي قبل كدا وتمام محصلش حاجة! طبعا أنا اتصدمت لما عرفت أنها مَش أول مرة الكلب يعض حد، ومع ذلك هي سايباه عادي في الشارع من غير كمامة أو حد قوي يمسكه .. بجد حرام عليكم.
وأضافت: "الكلب لما بيكون حجمه كبير وشرس بيعتبر سلاح، وصاحبه مسئول مسئولية كاملة عنه، ويحاسب على إهمال مسؤليته، خصوصا لو إهماله تسبب لشخص تاني في أذى بدني يحتاج أكتر من 21 يومًا للعلاج، وأذى نفسي ما أعرفش هيحتاج قد إيه عشان يخف".
واختتمت: "أنا كنت بحب أنزل أحط أكل وميَّه للكلاب والقطط تحت البيت، دلوقتي أنا حقيقي مرعوبة أقرَّب منهم وخايفة جدا.. أنا آسفة.. طولت عليكم، بس أنا بجد مَش عارفة المفروض أعمل إيه عشان محدش تاني يتاذي!".

يذكر أن شاركت رحمة حسن فى السباق الرمضانى الماضى بمسلسل "ملف سري" مع الفنان هانى سلامة، إنتاج شركة فنون مصر للمنتجين ريمون مقار ومحمد محمود عبد العزيز، وشارك فى البطولة مجموعة من النجوم، منهم : ماجد المصرى، وعائشة بن أحمد، ودنيا عبد العزيز، ونضال الشافعى، ومحمد محمود عبد العزيز، ومحسن محيى الدين، ونبيل عيسى نور محمود، وإيهاب فهمى، ومادلين طبر، وكارولين عزمى، وعلاء مرسي.