فيديو.. حنان ترك: "أنا مقدرش أفتى في دين ربنا وهناك صفحات تستغل اسمي"

تحدثت الفنانة المعتزلة حنان ترك، لأول مرة في بث مباشر على صفحتها الشخصية بموقع فيسبوك، للمرة الأولى مع جمهورها وظهرت غاضبة في البث المباشر من بعض الأمور التي نسبت إليها مؤخرا وقالت حنان : "استحملوني واستحملوا صوتي لأن عندي دور برد، وكان مفروض أطلع من الأسبوع اللي فات أقول الكلام ده".
وتابعت قائلة : "عايزة أشكركم وأشكر أسرتى اللى وقفت جنبى وقت مرضى، وكل أصدقائى اللى بيسألوا عليّ، ودكتور أشرف زكي كان بيكلمنى وبيطمن عليّ، وبشكر الجمهور اللى بدعواته الحمد لله بقيت أحسن بكتير وكويسة جدًا، ومش عارفة أشكركوا على إيه ولا إيه، وسعيدة إنى معاكم وانتوا وحشتونى جدًا."
واضافت قائلةً : عايزاكم تساعدونى على أى حد بيتكلم بإسمى، أنتوا اللى تقفوا لأنكم عارفين حنان ممكن تقول إيه ومتقولش إيه، لأن كان في صفحات كتير بإسمى بيتكلموا فى الدين وفى السياسة، وأنا مليش علاقة بيها وعمرى ما أنزل بوستات بالشكل ده.".
وأوضحت قائلة : أى حاجة نزلت على لسانى ويقولوا حنان قالت فتوى وإن ربنا غضبان على فلان، أنا ماليش علاقة خالص، أنا لا بحرم ولا بحلل، ولا الكلام ده له أى علاقة بيا، وأنا مقدرش أفتي في دين ربنا، وده له ناسه، ونصيحة لكل الناس، لما تحب تاخد نصيحة خدها من أهل العلم والناس المسؤولين عن الفتوى ومصرح لهم بها.".
واختتمت حديثها قائلة :" أنا جاهلة جدًا سياسيًا، ومعنديش وعى سياسى أنى أعرف أقول اعملوا حاجة أو متعملوش، ومعنديش الثقافة اللى تخلينى أنظّر سياسيًا، أما بالنسبة للدين أنا درست علوم شرعية على سبيل النجاة لا على سبيل الدعوة، والدعوة دى موضوع كبير جدًا، ومحتاج علم وفقه مش أي حد يقدر يعملها، أنا فين والكلام الكبير ده فين!.".