استعرض الدكتور طارق شوقى، وزير التربية والتعليم، خلال اجتماع لجنة المشروعات الصغيرة بمجلس النواب، تطوير منظومة التعليم ومجانيته. وقال شوقى: «مجانية التعليم تحدد قدرتنا على الحركة، اللى كتب الكلام دا عام 1952 مكنش يعرف إن مصر هيبقى فيها هذا العدد من السكان، إزاى عندنا إصرار نعلم الخايب والشاطر زى بعض. وأضاف: أنا بسأل اللى بيتكلموا عن العدالة الاجتماعية فى هذه النقطة، يعنى ايه عدالة اجتماعية، هل أضيع الكل لما أدى للشاطر زى الخايب، لأ أنا مش مع هذا النوع من العدالة ولا مؤمن بيها، فكرة العدالة المبسطة دى فيها ظلم فاحش، ظلم اجتماعى متساوٍ، فَلَو إنتواعاوزين تصلحوا بجد، لازم تناقشوا هذه الأفكار». وطلب الوزير بفتح نقاش مجتمعى قائلًا: «مجانية التعليم مينفعش تتساب بدون نقاش، لازم تناقشوه، لو فضلنا عايشين كده نبقى بنضحك على نفسنا، هنفضل عايشين كده لأمتي، ثم مفيش مجانية، اللى بيدفع الفاتورة الدولة والأهالي، الفاتورة اللى بندفعها مع بعض 200 مليار جنيه، ومش بتروح فى المكان الصح، والناس ممكن تدفع لأى حد إلا الحكومة، ثم سؤال للى بيقول لنفسه ملك الكيمياء، مين اللى خلاك ملك الكيمياء معاك شهادة بتقول كده؟». وتابع: «حفلة عمرو دياب وصلت ل20 ألف جنيه للتذكرة، وإحنا مش لاقيين فلوس نطور بيها التعليم، ولما نتكلم عن مجانية التعليم وضرورة إعادة النظر فى المصطلح، الناس ممكن تحدفنا بالطوب، الرئيس نفسه كان بيقول هنحل مشكلة الكثافة إزاى».. ومضى قائلًا: «ثم لو جيت قلت نلغى التنسيق الناس تعمل ثورة على طول، لأن نظام التنسيق هو اللى بيطلع الناس اللى قاعدة على القهوة، لأنه بيطلع تجارة إنجليزى وحقوق إنجليزى بمئات الآلاف، فى حين أن سوق العمل مش محتاجاهم، لو إحنا حددنا احتياجاتنا بغض النظر عن التنسيق بيضخ كام كانت اتظبطت».
