خاص.. "البوابة نيوز" في منزل طفل "أنام ربع ساعة يا حاجة".. والده: "ابني حالته النفسية سيئة ويا ريت وزير التعليم يرد"

تداول رواد مواقع التواصل الاجتماعي فيديو لطفل في الصف الأول الابتدائي، وهو يتوسل إلى مدرسته بالسماح له بالنوم قائلا لها: "والنبي يا حاجة سبيني أنام ربع ساعة، ربع ساعة بس وهعملكم اللي عايزينه".
وتداول رواد التواصل الاجتماعي مقطع الفيديو بشكل ساخر.. "البوابة نيوز" انتقلت إلى منزل الطفل والتقت والده، الذي أغضبه الأمر، قائلا: "ابني محمد بيعاني من تعب في قدمه، وكان آخرها قبل المدرسة بكام يوم، وبياخد علاج بيخليه ينام، وبدأت المدرسة وقولنا له روح ووصلناه وإنه بقي كويس، لكن عشان أول أيام الدراسة والأسبوع الأول الطفل تعب عشان مش متعود، وطلب من مدرسته إنه ينام، للأسف صوره المدرس، عشان يبقي مادة للسخرية من الطفل، وحاولنا نخرج ابننا من تعبه في المدرسة، ابني جاتله أزمة نفسية لما عرف إن الناس بتتريق عليه، وكل ما حد يقابله في الشارع يضحك ويقوله أنام ربع ساعة".
وتابع والد الطفل: "إحنا هنقدم محضر في المدرس والمدرسة وكل اللى ساهم في إن الطفل يتم تشويهه معنويا، هل إحنا وصل بينا الحال للسخرية من طفل رايح المدرسة ونتسبب ليه في أزمة هتفضل ملازماه طول حياته، يا ريت وزير التعليم يرد عليّ، إخواته رافضين يروحوا المدرسة برضه حزنا على أخيهم، الولد رافض يروح المدرسة، بسبب اللي حصل".