20 ألف نسمة يمرون بشارع عرضه متر في "أرض اللواء"

يعانى سكان 13 شارع بمنطقة أرض اللواء من ضيق مدخل الشارع، رغم وجود عدة حلول لتوسيع الشارع، ورغم تقديم المقترحات للحي، لكن الحى لم يستمع.
يقول رضا عبدالمجيد: «كل الطرق من بعد السلم الكهربائى بأرض اللواء اللى بتأدى إلى 13 شارع جانبى بتعتمد على شارع متر بالظبط، تم غلق الشارع لدواعى تأمين نقطة الشرطة، واحنا مش ضده، بس ممكن يكون الجراج بديلا للشارع، أو توسيع الشارع المتر اللى موجود قدام النقطة، يعتبر كمان ممر مش شارع، بالعافية بيمر واحد بس من الشارع، لو تم إزالة المنطقة المحاطة بحديد هيوسع الشارع، المشكلة بيعانى منها سكان الجارحى والطوخى حسن ورواش الطويل وعبدالمنعم رياض وأكتر من 10 شوارع تانيه، بالإضافة لأن الشوارع نفسها ضيقة».
ويتابع: «شارع رضا حماد المجاور للنقطة مازال مغلقا، المبانى ماكتملتش رغم إنه بيدخل لشوارع تاني، ممكن الحى يفتحه ويصبح الشارع صالحا للمرور، مش لازم ننتظر لحد ما يبنوا ويكون فى سكان، احنا خاطبنا واتكلمنا مع الحي، بس مش عارفين سبب سكوت الحى على ضيق الشارع وعدم فتح شوارع تانية، هل الشوارع أصبح يتم تأجيرها لأى حد والمواطنين مش مهم.
نداء للنائب عبدالرحيم على من 20 ألف مواطن بيناشدوك التدخل وحل المشكلة من خلال المحافظ، لأن رئيس الحى عارف بالمشكلة ومقدمش ولا استمع لحلول».
يضيف ممدوح علي، صاحب محل بالشارع: «ضيق الشارع مانع دخول العربيات وخروجها، حتى عربيات الإسعاف مبتعرفش تدخل، قُولنا إن مُمكن يكون الجراج حل لتوسيع الشارع من خلال إنه يتم شيله ويكون مدخل لدخول وخروج الناس والعربيات، أو يتم تقسيمه ويبقى نصه جنينة والباقى ممر».
استجابة لمطالبة النائب البرلمانى عبدالرحيم على، بزيادة وحدات الإنارة فى شارع المراغى بالعجوزة والشوارع المتفرعة، وذلك بعد تلقيه شكوى من أهالى الشارع بسبب ضعف وقلة أعداد وحدات الإنارة، تم تدعيم وحدات الإنارة بالأماكن التي شكا منها الأهالى.
وقام اللواء جمال الشوبكشى رئيس حى العجوزة، بتوفير وحدات إنارة الشارع، والشوارع المتفرعة منه، وإنارة الشارع كاملا.