ننفرد.. بنص تحقيقات النيابة مع زوج قبطية "الكرم".."دانيال" لم يتطرق إلى تجريد زوجته من ملابسها من قريب أو بعيد.. واتهم بعض المواطنين بحرق منزله وآخرين

حصلت "البوابة نيوز" على صورة ضوئية من تحقيقات النيابة مع زوج القبطية سعاد ثابت ضحية أحداث قرية الكرم بأبوقرقاص، والتي شهدت مفاجأة كبيرة حيث لم يتطرق الزوج إلى واقعة تعرية زوجته أمام النيابة من قريب أو بعيد، واتهم خلالها مجموعة من أهالي القرية بحرق منزله ومنازل آخرين والى نص التحقيقات:
س:اسمك وسنك ووظيفتك؟
ج:اسمي دانيال عطية عبدة شحاتة 78سنة فلاح ومقيم قرية الكرم أبوقرقاص المنيا ولا أحمل تحقيق شخصية.
س: ماتفصيلات شكواك؟
ج: اللي حصل إنني أنا كنت قاعد في البيت لقيت ناس دخلوا عليا البيت وسالوني علي ابني أشرف قلتلهم معرفش عنه حاجة، ولعوا نار في فرش البيت والتلاجات وكل حاجة، والبيت ولع كله وبعدين دخلوا بيت ضاحي، ولعوا فيه وفي كل الفرش اللي جواه وبعدين دخلوا علي بيت وجيه قصادي، وولعوا فيه وولعوا في بيت سامي كمال، وهود ده كل اللي حصل.
س: متي ولما حدث ذلك؟
ج:الكلام ده حصل بتاريخ 20-5-2016 بعد صلاة العشاء بقرية الكرم أبوقرقاص
س: من كان برفقتك آنذاك؟
ج: أنا كنت أنا ومراتي
س: مالذي حدث تحديدا آنذاك؟
اللي حصل أني أنا كنت قاعد في البيت لقيت مجاهد صلاح حسن ومجدي محمد محمد زناتي وأحمد توفيق سيد ورفعت محمود عبدالرحيم ورمضان محمود عبدالرحيم ومحمد محمود عبدالرحيم وأحمد محمود عبدالرحيم ونظير إسحق أحمد عبدالحافظ وعبدالمنعم إسحق أحمد عبدالحافظ وصالح عبدالحافظ أحمد عبدالحافظ دخلوا عليا وضربوني علي وشي، وولعوا في فرش البيت والبيت كله اتحرق، وكان فيه سبعة عشر ألف جنيه كانوا في جيبي خدوها مني وبعدين دخلوا ولعوا في البيت اللي جنبي بتاع ضاحي وفي بيت وجيه وكسروا بيت سامي كمال
س: وماصلتك بالمتهمين سالفي الذكر؟
ج: هما بلدياتي وجيراني ونظير إسحق ده صاحب ابني أشرف
س: هل كانت بحوزة سالفي الذكر أسلحة أو أدوات؟
ج: أيوه اسحاق كانت معاه بندقية آلي وابنه عبدالمنعم كان معاه فرد خرطوش ورفعت كانت معاه طبنجة وده اللي شفته بس، والباقي كان معاه أسلحة بس مخدتش بالي
س: وهل استخدم أي من سالفي الذكر السلاح الذي كان بحوزتهم؟
ج: أيوه هما ضربوا نار في الهوا وكانوا بيضربوا نار علي البيوت والبيوت اتحرقت من ضرب النار
س: ماهي عدد الأسلحة النارية التي استخدمها سالفو الذكر؟
ج: هي كتير معرفش كام
س: وفي اتجاه قام سالفو الذكر بإطلاق الأعيرة النارية؟
ج: كانوا بيضربوا عليا نار وعلي البيت عندي
س: هل بك أي إصابات
ج: لا
س: وهل توجد خلافات بين ابنك وبين المتهمين سالفي الذكر؟
ج: معرفش
س: وهل ترقي الخلافات لقيام المتهمين بتلك الواقعة ؟
ج: معرفش
س: وماقصد المتهمين من ارتكاب تلك الواقعة؟
ج: هما كانوا عايزين يموتوا اشرف واخوه وعايزين يحرقوا البيت بتاعنا
س: وهل حدث اتفاق فيما بين المتهمين علي ارتكاب تلك الواقعة؟
ج: ايوه علشان هما كانوا بيضربوا نار علينا وحرقوا البيت بتاعي
س:هل توجد أي تلفيات بمنزلك؟
ج: أيوه
س: هل معك شاهد علي تلك الواقعة؟
ج: أهل البلد كلها شهدوا تلك الواقعة
س:هل لديك أقوال أخري؟
ج:لا
واقفل المحضر عقب إثبات ماتقدم وقررنا الآتي
أولا: يصرف الحاضر من سراي النيابة مؤقتا
ثانيا: يستمر التحفظ علي مكان محل الواقعة
ثالثا: يندب أحد السادة المختصين بالأدلة الجنائية بالانتقال الي محل البلاغ لبيان عما اذا كانت هناك أثار حريق من عدمه، وفي الحالة الأولي تقرير رسمي وبيان متي كانت بداية اشتعال الحريق، وبيان عما إذا كان هناك مواد معجلة للاشتعال من عدمه، وعما إذا كان هناك شبهة جنائية من عدمه، وبيان عما إذا كان هناك آثار لإطلاق أعيرة نارية من عدمه، وفي الحالى الأولي بيان ماهيتها وطبيعتها والسلاح المستخدم في أحداثها وإعداد تقرير مفصل يعرض علينا.
رابعا: تخطر الشئون الاجتماعية لاتخاذ اللازم قانونا
خامسا: يطلب كل من عطية عياد فرج وعياد عطية عياد لجلسة تحقيق عاجلة.
سادسا: نامر بضبط واحضار كل من مجاهد صلاح حسن ومجدي محمد محمد زناتي واحمد توفيق سيد ورفعت محمود عبدالرحيم ورمضان محمود عبدالرحيم ومحمد محمود عبدالرحيم واحمد محمود عبدالرحيم ونظير اسحق احمد عبدالحافظ وعبدالمنعم اسحق أحمد عبدالحافظ وصالح عبدالحافظ احمد عبدالحافظ ويعرضوا علينا فور التمكن من ضبطهم.
سابعا: تدرج الأوارق بدفتر محضر التحريات.