تداول نشطاء موقع التواصل الاجتماعي "فيس بوك"، تدوينة لأحد الشباب "رفض ذكر اسمه"، قال فيها: "أنا حبيت أعز صحباتي واتجوزنا ومع هوجة الطلاق الكتيرة انفصلنا، وكان عن اقتناع مني أكتر منها في البداية.. وبعد مرور 6 أشهر على طلاقنا، أقدر أقول لكل راجل لسه متجوز 20 نصيحة عشان ميكررش غلطتي". 1- متبطلش تعاكسها، متبطلش تقولها كلمة حلوة، متبطلش تخرّجها، متفتكرش انك ملكتها بمجرد جوازك منها متبطلش كلامك الحلو، هو مش حصري للخطوبة والصحوبية بس. 2- احمي قلبك، متكبرش وتكبرها معاك، متعقلش وتعقلها معاك، متقولش لأ هبطل اعمل كذا أصلي اتجوزت، انت اللي بتمنع نفسك من الحياة وبتحرمها معاك، مترميش مشكلتك على شريكة حياتك. 3- اقع في حبها مرة، وكمان مرة، وكمان مرة متقولش خلاص حبينا بعض وعرفت عنها كل حاجة يلا نتجوز ! أعرفها اكتر، ادخل في تفاصيلها الحلوة وحبها، وتفاصيلها الوحشة وتقبلها، اختارها في كل مرة عقلك الذكوري يقارن بينها وبين شخصية في أحلامك، لأن هى الواقع. 4- شوف الحلو وحبه، بيّن انك بتحبه، قول انك بتحبه أو بمعنى آخر "قدّرها". 5- مش شغلانتك ولا مطلوب منك انك تغيرها "للأحسن" أو اللي انت شايفة أحسن، ماهو هتاحبها زي ما هى وتاخدها وتتجوزها وتغيرها فمتحبهاش فتطلقها فتسيبها فتدمرها وتقنع نفسك انك مجني عليك افهمها ازاي دي ؟!. 6- اتحمل مسئولية، اتحمل مسئولية عشان انت مش متجوز أمك، أمك بتحبك حب غريزي فبتعمل المستحيل عشان تشوفك مبسوط، مراتك ممكن تكون أمك فعلا من حبها ليك هتشوف فيك ابنها وجوزها بس مش مسئوليتها لوحدها أنها تخلي البيت وسيادتك سعداء !!. 7- عصبيتك مشكلتك، انشف واتحملها ومتطلعهاش عليها !. 8- حكمة متعلمتهاش إلا متأخر Let it be، لما مراتك تضايق، تتخنق، يحصل مشكلة وتتكلم معاك عليها Let her be يعني اديها مساحتها تتكلم وتشتكي وتعيط ومتطلعش السلاح وتقرر تحل كل المشاكل، هى مش صغيرة، هى لو عاوزة تحل هتحل ! هى عاوزاك تسمعها. 9- أضحك، بيقولوا سر سعادة البيت في الست ؟ لأ سر سعادة البيت في حجم الابتسامة اللي على وش شريكة حياتك ودي بتقيس مدى رجولتك في بيتك. فأضحك وضحكها هتلاقيها بالظبط زي الوردة كل يوم بتحلو أكتر وهتحلي حياتك أكتر وأكتر !. 10- اتعلم لغة حبها ليك، يعني مثلا بتحب اسم دلع معين كرروا ليها، بتحب الأكل، بتحب الورد، بتحب الplay station ؟ شوف بتحب ايه، اعمل مجهود إنك تعرفها. 11- خليك موجود، أصحابك هيتجوزوا وقاعدة القهوة كل يوم هتبقى مرة في الشهر، هى اللي باقية وموجودة !. 12- متبقاش أهبل، المشاكل بينكم هتحصل هتحصل ولا هى نكدية وزنانة ولا انت صح والحق معاك ! اما تحصل مشكلة عدي ومشّي المركب. 13- اديها مساحة تتنفس، تخرج مع أصحابها، متحولهاش لكائن بيتوتي لو هى بتحب الخروج ولا تجبرها تعزم أصحابك كل يومين في بيتها لو هى مش بتحب لمة الناس الكتيرة، خليها تتنفس. 14- مش هيحصل حاجة لو عيطت في حضنها، متقلقش مش هتذلك عليها في أول خناقة بينكم زي ما انت بتعمل، هي هتحترم لحظات ضعفك اللي انت مش بتحترمها. 15- ملعون أبو الفلوس.. اتجوز بالمبدأ ده وحياتك هتبقى رائعة لو عينها مليانة، بعزق فلوس عليها وعليك، الكفن مفيهوش جيوب أقسم بالله !!. 16- سامح.. متشيلش، سامح عشان انت ليك غلطة هتتمسك عليك في يوم من الايام وهي احتراما لمسامحتك ليها هتسامحك وتمشي المركب "ده لو انت راجل سوي". 17- الحياة مش جنس بس، تأكدوا أن العشرة والحب بتخليكم تقبلوا بعض والكلام عن الجنس بينكم وبين بعض مش عيب، بالعكس ده مطلوب وبشدة !. 18- احضنها، بوس رأسها، ومتحسسهاش أن أي حاجة بتطلع منها تافهه أو قليلة.. 3 قوانين احفظهم زي أسمك !. 19- دايما اختار الحب.. مش رومانسية فارغة بس الحب هو اللي بيمشي المركب في الحياة البائسة دي، لا كرامتك ولا غرورك ولااحساسك انك دايما صح.. كل دي حاجات بتهدم.. إلا الحب !. 20- كل اللي حواليك بيشتكوا من الجواز، اه دي حقيقة وانت بتعمل زيهم بس ولا واحد فيكم هيقدر ولا هيتجرأ على الطلاق وببساطة لأننا جميعا أنصاف حياة من غير نصنا التاني.
