أحمد حاتم ل"البوابة": كان نفسى أكون دولفين!

أنا طموح لأقصى درجة.. و زملكاوي متعصب
شريكة حياتى لازم أكون بحبها وتحبنى مش صالونات خالص
فنان متعدد المواهب، متعدد النجاحات من بطل سباحة بنادى الصيد لخريج إعلام لممثل موهوب قدر إنه يعمل ضجة بنوع جديد من الأفلام السينمائية فى الوقت اللى ظهر فيه وهى أفلام الشباب، كانت أولى تجاربه الفنية بطولة جماعية بفيلم «أوقات فراغ» ومن بعده «الماجيك» و«المركب»..أحمد حاتم فى حوار مختلف خالص.
■ إيه أكتر موقف طفولى مشرد؟
- طفولتى طفولة رياضية سخيفة ومشردة من الدرجة الأولى، ومن كتر ماهى كانت مشردة فصعب جدا أنى أفتكر موقف معين ممكن يتحكى يعني.
■ طيب خلينا نسيب مرحلة الطفولة بكل التشرد اللى فيها وننقل على مرحلة المراهقة.. شايف فى تغيير بين الشباب اللى كانوا فى سن المراهقة وقت عرض فيلم «أوقات فراغ» وبين الشباب بتاع دلوقتى؟
- فى فروقات كتير مش فرق واحد.. يعنى مثلا دلوقتى الموضوع بقى صعب جدا أو نقدر نقول إن شباب «أوقات فراغ» برىء جدا بالنسبة لشباب دلوقتى.
يعنى الشباب وقتها كان كبيره يزوغ من درس.. يشرب سيجارة بانجو وكل ده كان بيتعمل فى السر ومن ورا أهلهم، إنما دلوقتى بقى الموضوع عادى بقوا بيشدوا وبيضربوا وبيعملوا كل حاجة وتلاقى أن الموضوع بيتطور معاهم بسرعة جدا عكسنا تماما.
■ نسبة الاختلاف بين شخصية أحمد حاتم فى الحقيقة وشخصيته فى الأفلام من نوع «أوقات فراغ» و«الماجيك»؟
- كبيرة جدا لأنى مش من النوع اللى بيمثل بشخصيته، يعنى تقريبا مافيش دور عملته وكان قريب من شخصيتى خالص، هو ممكن يبقى قريب من تفاصيل جوا شخصيتى، إنما الشخصية من برا بتكون بعيدة جدا، بس يمكن أنا الناس صدقتنى زيادة عن اللزوم وده سبب المشكلة دى، أن الناس تفتكر أن ده أنا فى الحقيقة.
■ أكتر شخصية لعبت دورها وكانت قريبة لشخصيتك الحقيقية؟
- أكتر شخصية حبيتها كان دور علاء عبدالهادى فى «فيرتيجو»، لكن أقرب شخصية ليا كأحمد ممكن تكون أمير فى فيلم «المركب».
■ الحب.. والارتباط.. والجواز فين من حياة أحمد حاتم؟
- تقدر تقول المواضيع دى وقعت فيها كتير فى أكتر من تجربة، ومن كتر ما أنا وقعت فمش حابب أقع أو أكرر نفس الغلطات دى تانى وحاطط لنفسى خطوط عريضة المفروض أنى همشى عليها عشان لو فى تجربة جاية ماتبقاش زى اللى قبليها.
■ إيه هى الخطوط دى؟
- لا مش هقول.. خليها مفاجأة للى هرتبط بيها.
■ مؤمن بالحظ؟
- جدا.
■ حظك حلو طيب؟
- جدا جدا.
■ أكتر شخصية نفسك تمثل قصادها؟
- والله ناس كتير كان على رأسهم أستاذ خالد صالح الله يرحمه، والأستاذ ممدوح عبد العزيز، وطبعا الزعيم عادل إمام.
■ لو ماكنتش بتمثل، كنت هتبقى شغال إيه؟
- كرييتيف فى شركة إعلانات.
■ آخر فيلم شوفته فى السنيما؟
- فيلم gun woman.
■ مين الشخص اللى بتشوف فيه قدوتك؟
- بص تقريبا أنا فى كل مكان ليا فيه قدوة، يعنى مثلا فى البيت والدى بيبقى قدوتى، فى السنيما Leonardo DiCaprio مثلا.
■ لو ماكنتش إنسان كنت تحب تكون إيه؟
- ممكن دولفين هادى كده وفى حاله، وعايش فى الميه وبيلعب تلج وبياكل سمك ومكبر دماغه.
النسخة الورقية