سألنا نجوم برامج المواهب: روحتوا فين؟

برامج اكتشاف المواهب ولا دفن المواهب.. ناس كتير صوتها حلو وعجبنا في البرامج اللي ظهرت في الفترة الأخيرة بس بعد كده ماسمعناش عنهم حاجة وعشان نجاوب على السؤال.. قابلنا مواهب اشتركت في كذا برنامج وكلمونا عن تجربتهم.
مصطفى سعد اللى الفرصة سمحت له يشترك في برنامجى «صوت الحياة» و«آراب أيدول» كان أول واحد نسأله وقال: من الحاجات اللى استفدتها من المشاركة في البرنامجين الشهرة وإنى أعرض موهبتى على الجمهور في الوطن العربى، رغم أن «آراب أيدول» بيتم اختيار الفائز على أساس سياسي.. يعنى مستحيل تلاقى موسم يكسبه مصري والموسم اللى بعده يكسبه مصري برضه حتى لو يستحق.. فالاختيار مش على أساس مين اللي يستحق.
وفكرة رعاية المواهب بعد البرنامج مافيش الكلام ده.. هما بس بياخدوا اللى عايزينوا من المشتركين وبس. هدير فايد اللى اشتركت في «صوت الحياة» قالت بعصبية: عشان أكون صريحة أنا ما استفدتش من «صوت الحياة» بالعكس الموضوع كان سلبى جدا والموضوع ماكانش لطيف.. ماحطونيش على أول السلم بالعكس أنا في ناس عرفتنى من على «الساوند كلاود» أكتر، واللى حسيته أن مافيش حرفية في اختيار الأصوات، يعنى مثلا كان في أصوات حلوة جدا بس ماكملتش زى حسام حسنى اللى طلع في «ذا فويس» ده صوته كان خامته حلوة جدا وحقق شهرة واسعة.. فأنا مش عارفة الاختيار بيتم على أساس إيه!! يعنى شكل ولا صوت بس اللى أنا متأكدة منه إنه ماكانش في عدل.
أما عبدالعظيم الذهبى اللى وصل للمرحلة النصف نهائية من تصفيات «ذا فويس» فكان ليه وجهة نظر تانية وقال: الشهرة طبعا والخبرة في الوقوف على المسرح ومواجهة الجمهور وأنا شايف أن «ذا فويس» أكتر برنامج احترافى موجود على الساحة ومن وجهة نظرى شايف إنه رقم واحد لأنه بيتلكم عن الغنا مش مجرد شو وبيعتمد على أن المشتركين فيه عندهم خبرة حتى لو بسيطة اكتسبوها قبل مشاركتهم في البرنامج، ومع ذلك المتسابقين مابيحصلوش على الرعاية المطلوبة لموهبتهم بعد أما البرنامج بيخلص وده سببه المنتجين اللى بيدوروا على المادة والمكسب، فبدل ما هو منتج فنى بقى تاجر.. ده حتى المطرب اللى بياخده البرنامج مابيتعملوش التسويق الجيد، ومافيش أي رعاية ليه. أما صابرين النجيلى اللى وصلت لمرحلة النصف نهائيات برضه ببرنامج «آراب أيدول» فشافت الموضوع من وجهة نظر تانية وقالت: «آراب أيدول» استفدت منه إن الناس اتعرفت عليا وعرفت صوتى لكن استفادة فنية ما استفدتش غير 20٪.. فمثلا كنت أول مرة أغنى فكان عندى رهبة من المسرح لأن أول مرة أقف عليه، وبعدين بقى عندى ثقة غير كده ما استفدتش.. ده حتى الناس اللى وصلت للفاينل البرنامج مش بيفدهم أو حتى بيراعى مواهبهم، وحتى لو راعوا حد بيعملوله أغنية أو كليب عشان يراضوه كده بس.. اللى بيكمل مشوار الغنا بيبقى بعيد عن البرنامج، فأنا مثلا احتمال انضم لشركة إنتاج كبيرة ومعروفة، وحاليا بحضر أغانى سينجل.
وأنا شايفة إن مافيش احترافية مع أن اللى بيختار المواهب اللى هتشارك في البرنامج ناس محترفة، بس الإنتاج ليه سلطة في الاختيار.
النسخة الورقية