نجارة ل «منخور » حورية .. وصيانة لشباك « بُق »غادة

سجلت غرفة دلع الستات بالقاهرة ، انتعاش سوق نجارة وصيانة البني آدمين ف الوسط الفني . . أخيرا الحظ ضحك لعيادات التجميل ف البلد .. من قعدة فريح الحيط والأيد ع الخد ل« أسطاوات ودكاترة التجميل » إلى بشبشة وفلوس وملايين من عمليات التجميل للفنانات والنجمات والمحتاجات .. مية وتلاتة عيادة في القاهرة بس تخصص نجارة مناخير الفنانات وصيانة وتعديل شبابيك البُق، وضبط زوايا واتزان الوسط ورصرصة البروز الخلفية وشفط الدهون المنتشرة على خريطة الجسم .. يعني باختصار الفنانة من دول تدخل العيادة دي بشكمانات مناخير طويلة وعريضة وبُق مترين وجسم كيس قطن وبينفس ، تطلع مارلين منورو "التايواني طبعا" .. حاجة كدة زي التقفيل الصيني للبضاعة المضروبة .. شكل ومنظر وقيما وسيما والمضمون خربان .. معظم مشاهير الفن من نجمات السينما ركبن قطار التجميل هنا ف مصر .. وهناك ف بلاد الفرنجة .. غادة عبد الرازق مثلا : أجرت نجارة ل« مناخيرها » مرتين تلاتة بفاتورة عدت تلتميت ألف دولار .. وصرفت ميت ألف لزرع اتنين حاجب بنجيلة هندية و صيانة للبُق .. هيفاء وهبي ، رمت متين ألف لحلوح دولاري لضبط زوايا الوسط ورصرصة البروز الخلفية والذي منه .. أما أنف حورية ف ده حكاية .. مين حورية ؟؟.. حورية فرغلي المُزة السمرة الحلوة ، قررت استعدال مناخير جنابها .. اتفقت مع وسطاء لدكتور التجميل الفرنسي بعمل « ديسكاوند» لصيانة الوش والحواجب والوسط مع المناخير .. بحسب المصادر ، أرسلت حورية رسالة للدكتور التجميل ، مضمونها : الُدك حبيبي .. مزنوقة في تصوير شوية أفلام .. أبعتلك مناخيري ولاّ أجيبها وعدّي ..