إنت قادر تهزم ضعفك.. خواطر أحمد نبيل العريني

الضعف مش عيب، الضعف أحيانًا بيكون سبب في استعادة قوتك من تاني، فيه ناس كتير جدًا بتتعامل بضعفها مع نفسها، و ناس أكتر ضعفها دايمًا بيكون مُتحكم فيها، الضعف مرض لو إتحكم فيك، الضعف سبب لو قدرت تحوله لقوة تكسّر بيها كل الحواجز اللي منعاك من إنّك تقوم من تاني.
انت قادر تهزم ضعفك، انت السبب اللي بيه هتقدر تتغلب على كل أوجاعك وأحزانك علشان توصل لنقطة الأمل، لنقطة النور، فيه ناس بتضعف قصاد كلمة، وناس بتضعف قصاد فلوس، وناس ضعفها بيكون سببه الناس.. الضعف قصاد الكلمة بيحتاج منك قوة عقل، كلمة بحبك مثلًا، كتير جدًا مننا بيضعفوا قصادها، الإحساس نفسه، وممكن يتحولوا لعبيد للحب في ثواني، الحب عشان تحس بحلاوته لازم تستقبله بالطريقة الصح، الطريقة اللي تخليك ملك، وتخلّي حبيبتك ملكة، مش مجرد اتنين قريبين من بعض و كلها كام يوم/ أسبوع/ سنة و هيسيبوا بعض، الحب جنّة.. لو قدرت تفهم من جواك كويس إن عشان تحب لازم ترضي الله ربنا هيرزقك بزوجة صالحة تحبك بجد وتوصل معاك للجنّة.
الضعف قصاد الفلوس ده بيكون مرض، إنت مدمن فلوس، بتشوف الفلوس و كأنها طوق النجاة اللي هينقذك من كل اللي انت فيه، بقيت أداة الفلوس بتحركك زي ما هي عاوزة، صدقني طول ما إنت مسلّم نفسك للفلوس هتبقى رخيص
الضعف قصاد كلام الناس ده تقريبًا، أقوى ضعف، إنّك تكون عامل حساب قوي لكلام الناس، إنّك تخاف تتكلم أو تقول رأيك علشان كلام الناس اللي إنت عارف و متأكد إنه هيهزمك لأنك خوّاف، إنّك تخاف تمشي في الشارع لأن الناس هتفضل تتكلم عليك من وراك، إنّك تخاف تنصح و تفيد غيرك لأن الناس هتقول ده أكيد له مصلحة من كدة، إنّك تكون خايف من جواك طول الوقت من الناس ..
دايمًا كرّر الجملة دي " أنا هعمل اللي أنا عاوزه عشان أنا عاوزه مش علشان الناس عاوزاه، هعمل اللي يرحيني و اللي يسعدني و عمري ما هضعف قصاد كلام الناس " اكتبها في ورقة و كل فترة بُص فيها، خد دفعة قوية وماتضعفش، الناس مش هتبطّل كلام و انت لو فضلت مُهتم لكلامهم هيهدوك، هيحولك لأداة يحركوها زي ما هما حابيين؛ فبلاش تقلل من نفسك لأنك بكل صراحة وبساطة قادر تهزم ضعفك.