انفراد.. تسريبات جديدة لقيادات الإرهابية الهاربين في الخارج.. القدوسي لخفاجي: لما تبقى ريس يا مولانا آيات العرابي لازم تمسك المخابرات.. الأمريكان اختاروها صح بعد انتهاء دور عمرو العفيفي

- معتز مطر مطلوب في قضية مخدرات ومش عايزين حد يعرف
تنفرد "البوابة" بنشر نص محادثات الخونة الهاربين إلى أمريكا وقطر وتركيا وهم محمد ناصر مذيع قناة الشرق مع باسم خفاجي الإخواني الهارب ووليد شرابي القاضي الهارب إلى قطر.

المكالمة الأولى بين باسم خفاجي ومحمد ناصر
محمد: ألو إزيك يا مولانا متشكر جدّا وصل الشيك وصرفته كمان بس ده كتير والله وأنا مبعملش غير الواجب
باسم: لا أنت تستحق يا محمد وطريقتك وإلقاؤك جميل وعاجب الجماعة أوي أوي
محمد: الشكر ليك يا مولانا وللأخوة هنا في تركيا وعلى فكرة أكتر واحدة تستحق الشكر آيات عرابي.. أنا كمان اتصلت بيها هنأتها على الشغل العالي وعلى فكرة لما تمسك ريس يا مولانا آيات دي لازم تمسك المخابرات.
باسم: ههههههههه حبيبي يا ناصر بإذن الله قريبّا وعاوز أقولك أن أردوغان عارفها بالاسم ومهتم بيها جدّا جدّا كفاية أن هي حلقة وصل مهمة مع الأمريكان.
ناصر: الأمريكان اختاروا فعلا صح خصوصّا بعد انتهاء دور عمرو العفيفي.. مكانش ليه كاريزما والناس فقسته بسرعة أوي أسرع مما تتخيل، إنما آيات وضع تاني، ست وليها شعبية وفعلا مساعدانا أوي في اللي احنا بنعمله وليها جمهور بيصدقها.
باسم: على فكرة أنا عاوز أقابلك أنت ومعتز مطر علشان أديكوا حاجات مهمة أوي ومش هتنفع في التليفون ولا حتى على الميل، الحاجات مهمة فعلا.
محمد: بإذن الله يا مولانا حدد أنا ومعتز ونرد عليك بس احنا اليومين دول مشغولين جدّا زي ما أنت عارف.
باسم: وفقكم الله، معتز أخد الشيك ولا لسه؟
محمد: تمام يا مولانا أخده وصرفه كمان برضه.
باسم: عاوزكم تشدوا حيلكم كده وأول ما ننزل مصر ليكم عندي مفاجأة هايلة
محمد: معتز عليه قضية غيابي ولغاية دلوقتي ما أخدش براءة ههههههههههههه
باسم: اللي هي بتاعة شيك عمرو عاطف ولا حاجة غيرها؟
محمد: لا ده من أيام الكوفي شوب اللي كان بتاعه اللي في مصر الجديدة، ضابط كان ملفقله حته حشيش وأخد إخلاء سبيل بكفالة وبعد كده نسيها.
باسم: هههههههههههه ربنا كريم الحاجات دي بتخلص بالفلوس يا محمد خليه يشوف محامي عقر حيجيبله براءة بسهولة.
محمد: أيوه بس دي جناية ولازم يكون حاضر ويعمل إعادة إجراءات وحضوري لأنه متهم فيها لوحده مفيش شركاء أو حاجة.
باسم: خير خير بإذن الله هتخلص ولا يكون عنده فكرة خلينا احنا بس في شغلنا وكل ده في يوم من الأيام هيخلص، بس أهم حاجة اوعى حد يعرف أي حاجة عن القضية دي لحسن لو حد عرف ولا شم خبر الإعلام بتاع السيسي هيستلمنا تشويه بقى وأنت عارف محدش بيرحم حد اليومين دول.
محمد: لا بإذن الله يا مولانا محدش عنده أي فكرة عن القصص دي والشرطة أصلا مش فاضية تهرش ووراها بلاوي محدش حياخد باله.
باسم: ماشي يا حبيبي مش هعطلك ولو عوزت أي حاجة أنا مكتبي مفتوح.. أنت عارف بس بلاش أي ميلات اليومين دول لحسن انا حاسسس أن فيه ناس بتشمشم ورانا.
محمد: حاضر يا مولانا أسيبك في رعاية الله.
باسم : في رعاية الله.

المكالمة الثانية بين المستشار الهارب وليد شرابي وبين محمد القدوسي الكاتب والمحلل السياسي الهارب
قدوسي: إزاي بقى يا سيادة المستشار.. ده أنت وزير العدل القادم
شرابي: أنا أملي فيكم وفي ربنا كبير أوي ولو حصل ده فعلا هفجر المنطقة خالص
قدوسي : بإذن الله الرجالة شغالة أهي وخلي بالك أهم حاجة الجيش والقضاء والداخلية، لو فعلا وصلنا للناس أن ال3 وزارات دي تعبانين تأكد تمام إننا راجعين تاني.
شرابي : أيوه بس أنا معجبنيش خالص التسجيلات اللي بتقولوا فيها إنها تسريب لوكلاء نيابة.. يا جماعة اشتغلوا بحرفية أكتر ما ممكن الحكاية تتفقس.
القدوسي: يا سيادة المستشار أهم حاجة عمل ضجة وخلاص وكده كده الناس هتصدق ومحدش هيتابع ورانا ولا حد بيسأل وخلي بالك مهما كلمت الناس ولا حاولت تفهمهم اللي في دماغهم في دماغهم بس أدينا بنحاول وشغالين.
شرابي: حكاية قناة الشرق دي مفقوسة أوي.. اشمعنا يعني دي اشتغلت تسريبات بعد ما الجزيرة قفلت؟

القدوسي: بص.. احنا دورنا ننفذه وخلاص يا سيادة المستشار ولا أنت مش قادر تنسى إنك خريج كلية الشرطة هههههههههههه
شرابي: والله أضحكتني يا ريس بإذن الله خير.
القدوسي: بإذن الله دي بس مجرد بداية بس اللي حييجي أحسن وأفضل بارك الله فيك وفي الأخوة كلهم
شرابي: أنا عندي حتة أرض في مصر 1500 متر في الغردقة تفتكر أبيعها بتوكيل ولا ممكن الناس في مصر تصادرها.
القدوسي: اتقل شوية يا سيادة المستشار لغاية ما الأمور تستقر والدنيا تتنسي وساعتها أعمل اللي أنت عاوزه وأكيد الناس مش مقصرة معاك في المصاريف يعني ولا أيه؟
شرابي: لا أنا بس كنت عاوز أجيب حاجات تانية بس مش مهم هخليها بعدين
القدوسي: هكلمك تاني بس أشوف محمد الشرقاوي عاوز أيه هو ومحمد الفقي
شرابي: في حفط الله سلام

المكالمة الثالثة بين باسم خفاجي وعمرو فراج مدير شبكة رصد
عمرو: ألو أيوه يا مولانا أنا شغال أهو نار وبإذن الله هنخليهم ما يتهنوش على ثانية واحدة من غير قلق.
باسم: يا عمرو لازم تفهم أن رصد أصبحت واحدة من أكثر الأدوات اللي مهيجة الدنيا وهو ده بالضبط المطلوب.. الصراحة أنت وآيات عرابي أكتر اتنين شايفين شغلكوا وهاحاول أخد شوية تسجيلات مضروبة تذيعها عندك في رصد علشان الموضوع ميبقاش من قناة الشرق أو معتز مطر بس؛ لازم ننوع علشان نخلي المتابع يفتكر أن التسريبات نازلة ترف وأن السيسي مش عارف يحافظ على أمن مكتبه وفي نفس الوقت القضاء متحكمين فيه وبالأمر أي حكم يعرفوا يغيروه.
أنت بقى يا عمرو على ما آيات تبعت الحاجة بتاعة الداخلية عاوزك تحاول تسخن العالم على قد ما تقدر علشان الهجوم يكون من كل مكان.
عمرو فراج: ما تخافش يا كبير أنا بإذن الله هخليهملك ما يعرفوش يناموا بس أهم حاجة بقى ما يعرفوش أن القدوسي بيكلم محمد حسين لأنه لو اتعرف كل حاجة هتبوظ ويا ريت أنت تتدخل بنفسك يا كبير.
باسم: حاضر يا عمرو أهم حاجة بس أنزل بإعلانات ممولة كتير علشان الناس ابتدت تزهق وما تكررش نفس الكلام كل مرة وخلي بالك التواصل الاجتماعي أصبح مؤثرا أكتر بكتير من القنوات.. والله كل القنوات أخبارها من شبكات التواصل الاجتماعي يا عمرو.
أنت من ناحية وآيات من ناحية وهتولع بإذن الله.. هفكرك يا عمرو أنا هخليك وزير إعلام بس نخلص من البلاوي اللي في مصر دي.
عمرو: تمام يا ريس وأنا تحت أمرك وسلامي بقى للدكتور وبإذن الله على تواصل دايمّا.
باسم: تحت أمرك يا عمرو أنت تستاهل كل خير أنت وفريق العمل بتاعك وعاوزك تركز أوي على القضاء والداخلية
عمرو: حاضر يا ريس وسلامي للجميع.