السيد عبد العاطى البيروقراطى ،،،، صلاح جاهين

السيد عبد العاطى البيروقراطى ،
من " بيروقراط" مركز مش فاكر ايه ،
كل بلدهم بهوات سبحان العاطى ،
الكاتب بيه ومدير المصلحة بيه ،
والسيد – عبد العاطى البيروقراطى
راجل دوغرى ، فاهم إيه اللى عليه ..
راجل يعرف امتى ينخنخ ويطاطى
وكمان يعرف امتى يدلدل رجليه.
ييجى المكتب ، بدرى بمواعيد ظباطى ،
والساعة اتنين ولا ورقة تكون فى ايديه.
فنان فى الشغل ، وفنه أرستقراطى ،
الفن فقط للفن ، بتضحكوا ليه ؟
لا تقوللى مصالح شعب ولا كلام واطى ،
الهدف السامى علاوه تلاته جنيه.
والسيد عبد العاطى البيروقراطى
" السد العالى " ف نظره .. اسمه دوسيه !