خبراء العقارات: تشجيعهم علي التملك هدف استراتيجي

ردود أفعال غاضبة من المصريين بالخارج ضد أرض الإسكان المتميز

كنت عايش علي أمل أن يكون لي بيت يزيد من انتمائي إلي هذا البلد ولكن مفيش فائدة انكتب علي الغربة أعيش علي طول في الغربة لا في عهد المخلوع مرتاحين ولا في عهد الفلول هنرتاح خايف مانرتحش في الآخرة حسبي الله ونعم الوكيل في صاحب هذه الفكرة هكذا علق طلعت أحد المصريين المقمين في الخارج علي تصرحات الدكتور فتحي البرادعي وزير الاسكان حول طرح 8 آلاف قطعة أرض إسكان متميز في عدد من المدن الجديدة للمصريين في الخارج بسعر يتراوح حسب المنطقة مابين 500 دولار و700 دولار.
تصريحات البرادعي أصابت المصريين بالخارج بالصدمة الدماغية علي اعتبار أن معاملة الحكومة لم تتغير لهم والثورة لم تشفع لهم بأنهم مواطنون مصريون لهم حقوق مثل السواد الأعظم من أبناء البلد المقيمين داخلها، وانه لاتزال النظرة اليهم نظرة الدرجة الثانية أو أبناء البطة السودة.
رؤساء الجاليات المصرية المقيمين في الخارج اعتبروا أن تصريحات "البرادعي" إهانة للمصريين لا تغتفر وإنه يحاول العمل علي استنزافهم دون اعتبارات أن أغلبهم يعيش في ظروف صعبة بالخارج وليس معني عملهم أنهم يغرفون الدولارات حتي يتم وضع العراقيل أمامهم.
العالم اليوم "الأسبوعي" رصدت ردود أفعال المصريين بالخارج من خلال رسائلهم وتعليقاتهم علي تصريحات "البرادعي" تاني بتحولوا المتاجرة علي الشباب انتوا فكرين بنتاجر في الذهب حرام عليكم اصحو واتقوا الله فينا.
ولم تختلف الرسالة التي أرسلها أحمد سعود مقيم بالسعودية كثيرا يقول يا معالي الوزير: الأسعار مبالغ فيها أنا من المنيا في بداية شهر أكتوبر كانت وزاره الإسكان طرحت أراضي في المنيا الجديده سعر المتر كان يتراوح ما بين 300 إلي 600 جنيه للمتر ودلوقتي حضرتك عايز المتر ب 200 دولار ما يعادل 1200 جنيه أنتو كده بتذبحونا أنا كنت متخيل أن يكون المتر ب 500 جنيه.
حسبي الله ونعم الوكيل في كل ظالم، نفسي في قطعة أرض سكن لي ولأولادي ونفسي في قطعة أرض اندفن فيها لما أموت مفيش فايدة شالو ألدو وجابو شاهين ويبقي الحال علي ما هو عليه وعلي المتضرر يضرب دماغه في الحيط البلد دي مش بتاعة غلابة البلد دي بتاعة اللي معاه فلوس حسبي الله ونعم الوكيل هكذا كان تعليق أحد المغتربين بالسعودية.
أكرم الزعيم أحد المقيمين بالخارج عبر عن حاله بقوله هذه طريقة جديدة لسرقة شباب مصر المهجرين من النظام الفاسد السابق ومازال الفساد مستمر، لنا الله هواعلم بنا أيها الجهلة في حكم أرض الكنانة حسبي الله ونعم الوكيل.
أما محمد أبو العينين بالكويت يقول "حرام عليكم انتو فاكرين إحنا بنغرف فلوس بالمغرفة إنتو كفرة ومش عارفين إحنا هنا بنشتغل ازاي ولا حاسين بأي حاجة وأسعار نار وزي الزفت نيابة عن قطاع كبير من العاملين بالكويت".
أول ما سمعت الفكرة فرحت وقلت أخيرا بلدنا اللي نسيانا افتكرتنا وفقا لما قاله شريف بودي فالأسعار نار - وتابع - هما ناويين يغلوا أسعار الأراضي في الأماكن دي ولا إيه يعني اللي من الحكومة سعرها كده أمال ملاك الأراضي في الشيخ زايد هيبيعوا المتر بكام للناس العادية دي الناس المتغربة نفسها تتعوض عن سنين الغربه وبرضه تساعد بلدها لكن بالمعقول ليه هو احنا بنقبض كام.
قال أحد الشباب العاملين بالخارج لابد النظر للشباب اللي في الخارج الشباب اللي عمرها 25 سنة دي لسة معملتش حاجة وعايزة تتجوز وتجهز نفسها ويكون ليهم شقة في مصر ونتمني اعادة النظر في الأسعار والمساحات ولو حتي في شقق إحنا مش كلنا مليونيرات وعايزين فلل احنا بس عايزين شقة مساحتها كويسة.
كان وزير الاسكان قد قال مسبقا ان الحكومة ستبدأ خلال الأسبوع الأول من شهر مارس المقبل بطرح 8 آلاف قطعة أرض إسكان متميز في عدد من المدن الجديدة للمصريين في الخارج، إن سعر المتر لتلك الأراضي التي تم اختيارها في مواقع ممتازة سيكون 500 دولار للمتر بمدينة القاهرة الجديدة و675 دولاراً بمدينة الشيخ زايد و420 دولاراً في دمياط الجديدة و250 دولاراً بمدينة بدر و200 دولار بألمنيا الجديدة، وسيكون الحجز بالأسبقية بحيث يتم دفع 50% من ثمن الأرض كمقدم وال50% الأخري تقسط علي دفعتين في سنتين وفي حالة دفع ال50% الثانية مقدماً يحصل الحاجز علي 10% خصماً من الثمن وان الهدف تحقيق عائد يقدر ب3.5 مليار دولار منها 3 مليارات دولار من أراضي الإسكان ونصف مليار من أراضي الخدمات، وان إجمالي الاستثمار المباشر المتوقع من بناء هذه الأراضي يبلغ 7 مليارات دولار منها 5ر4 مليار دولار في أراضي الإسكان والباقي في بناء أراضي الخدمات بالإضافة إلي توفير 150 ألف فرصة عمل علي مدي 5 سنوات.
شوهت الفكرة