تايه من كلامها كلام

تهرب من شتا الغربة
لبرد بيسرِي جوه الروح
وتتدارَي من المكتوب
ف حيرة معاك منين ما تروح
وتتكعبل ف أحزانك
تُقع و تقوم
وتستعجل سنين العمر وتعدي
وتتحايل وتترجَّي
يا ستي استني
طَب هدِّي
خلاص الفرحة أهي جاية
هتتأخر لكن جاية
تقولك لأ
معادش مكان
ما بين كام ذكري مجروحة
وكام صورة بلون بهتان
وكام غنوة
يرن نغمها ف ودانك
وتايه من كلامها كلام
معادش مكان
وتتكعبل ف أحلامك
تُقع و تقوم
بقيت بتخاف من المقسوم
بقيت بتخاف من المسافات
وم الأوقات
ومن شنطة سفر قاسية
بقيت بتخاف عيون الناس تكون ناسية
تخاف ينسوك ..
يقولوا .. أيوه كان طيب
وكان مجدَع
وكانت ضحكته عاليه
لكن غايب
بعيد غايب بقالُه زمان !!
دعاء عبد الوهاب الجيزة