عيد الحب : بالصور.. الأحمر يكسو الشارع المصرى فى الفلانتين

مصر الدولة الوحيدة فى العالم "اللى عندها عيدين للحب فى السنة، الأول: 4 فبراير، وده عيد المصريين لوحدهم، والثانى 14 نوفمبر"عيد الحب العالمى الفلانتين" وده لأن الشعب المصرى شعب رومانسى وإنسانى، برغم من كل الظروف والأحداث التى تحدث فى البلد من اضطرابات سياسية وعنف وبلطجة ودم يسال وسحل للمواطنين وتخريب وإحراق وانقسام واستقطاب فى المجتمع، وصراخ فى الفضائيات وعويل على مصر وعلى شعب مصر، وأن مصر ستفلس والاقتصاد ينهار والكرامة تسلب، إلا أن الشعب المصرى يخرج من هذا الضباب، والغيوم، ويقرر الاحتفال بعيد الحب، وشراء الورود، رمز المحبة والدباديب رمز العشق والغرام، نافيا ورافضا ما يتردد ويقال، ضاربا أروع الأمثلة بأنه ذو عبقرية وأنه مختلف عن بقية شعوب العالم، ويثبت للعالم كله أن المصريين وسطيون وحضاريون لا أحد يستطيع تغيير هويتهم ولا طبيعتهم.
أكد طه إبراهيم 40 سنة صاحب محل للبيع "الورد والزهور" أن حركة البيع والشراء معقولة فى ظل هذه الظروف، وأن هذا الموسم بالنسبة له جيد كصاحب محل، وأن الأسعار لا تختلف كثيرا، وإن كانت مرتفعة بعض الشىء عن العام الماضى، وأن الإقبال معقول، مضيفا، أن الورد مرتبط بالمصريين وغير مقتصر على "الفلانتين" فقط، فالمصريون يشترون الورد أثناء الزيارات العائلية والمرضية، و"حتى لو كان الزوج "متخانق" مع زوجته بيجبلها ورد علشان يصالحها، وبيشتروا الورد كهدايا لأولادهم، غير أن المصرى بألف حال، يبقى عنده مشاكل كثيرة لكن بيقدر ينسى، ويتغلب على الأمور، وهى دى عبقرية الشعب المصرى".
وأضاف طه: قائلا "لو نظرت لحالة المصرى وسألته عن همومه وأحواله تقول، أنه مينفعش يعيش أصلا، ولما يأتى موسم المدارس يصرف ويشترى، ولما يأتى العيد كذلك يصّرف ويأتى بمستلزمات العيد، ولما يأتى عيد الحب، بيحب وبيشترى ورد، وكذلك موسم رمضان وعاشوراء وكل المواسم، وهو دا المصرى".
وكشف محمد عبد الوهاب، 38 سنة صناعى ورد وزهور، "أن المصريين عاشقون للورد، وبيع الورد مش مقصور على الشبان والشبات فقط، وإنما هناك الكبار فى السن يعشقون الورد، لأنه بيقرب الناس من بعضها وبيجيب الأمل والود والمحبة، مضيفا، أن للورد أنواع وأسماء كثيرة والمصريون يحبون المستورد علشان بيعيش أكثر".
وفى نفس السياق، ذكر خليل إبراهيم حسين، 30 سنة صاحب محل، أن الموسم هذا العام جيد، قائلا: "بعد ما شفت على التليفزيون القتل والسحل أمام الاتحادية وحرق المبانى الحكومية، أنا كنت قلقان جدا، لكن الحمد الله ربنا ما بينساش حد وربنا هو اللى بيرزق".
وتابع خليل، قائلا: "على فكرة كثير من زبائن المحل من الشيوخ والمنتقبات بيجوا يشتروا منا الورد والزرع، وأن الإشاعات أن الشيوخ بيحرموا بيع الورد دا كلام مش صحيح، للأسف فى ناس عايز تخوف المصريين وترعبهم".
واستطرد: خليل، أن الورد فيه المستورد والمصرى، وأن الورد المصرى شكله ومنظره جميل وأحسن من المستورد، لكن ما بيعيش فترة كبيرة، مثل المستورد، وأن الألوان المحببة فى عيد الحب هو اللون الأحمر، سواء فى الدباديب أو الورد، لأن الشعب المصرى بيحب اللون الأحمر فى الجو الرومانسى، مضيفا أن بيوكيه الورد يبدأ من 10 جنيهات لحد 200 جنيها مثلا، زى ما يحتاج الزبون، ولو الزبون عايز وردة أو أى عدد ممكن يشترى، والوردة الواحدة تبدأ ب2 جنيه، لكن المستورد ب7 جنيهات أو 10جنيهات.
وأضاف، جمال محمد عبد القادر25سنة صنايعى ورد، قائلا: "الورد حساس، وعلشان أنسقه وأزخرفه للزبون لازم أكون حساس ومرن، لأن التعامل معه بعنف أو بسرعة يفسده، إحنا هنا بنصنع البكويهات بطرق مختلفة تتماشى مع كل الأذواق، والزبون يختار، أو ممكن الزبون يختار الورد والألوان وأنا أصنع له البوكيه كيفما يريد".
وأوضح سالم فتحى 30 زبون، "أنا أعشق الورد، لأن كل مشكلاتى بخلصها ببوكيه ورد، وعشان كده عيد الحب لازم احتفل بيه بالورد، وياريت الجماعة اللى مختلفين فى السياسة سواء فى الإخوان أو المعارضة، يستغلوا مناسبة عيد الحب، وكل واحد يجيب للثانى وردة ولو ب5 جنيهات، حبا فى مصر".
وأكدت "س" جدة زبونة، الورد رمز للنقاء كله والإخلاص والمحبة والألفة، قائلة، "عايزين نحب بعض، وما فيش أحسن من الورد نقدمه لبعض علشان نحب ونقدر بعض، وإحنا محتاجين أمل فى بكرة، وإن شاء الله بكرة أفضل، وأنا ما بيجبش الوردة علشان عيد الحب فقط، أنا بيجبها علشان أدخل بيها البيت، ما عندكش فكرة تأثيرها بيكون كبير قد إيه".وقال محمد الباشا 27 خاطب "أنا بانتظر عيد الحب كل سنة منذ أن خطبت، علشان أقدم لخطيبتى وردة تنسينا كل مشاكل السنة اللى فاتت ونعيش فى أمل بكرة".
وأكدت ن، م 22 سنة "أنا لازم أجيب لخطيبى ورد ودباديب، ولما أجوز، إن شاء الله مش هفوت عيد إلا لما أجيبله دبدبوب وورد علشان الورد كله رومانسية وحب، وأنا نفسى حياتى وحيات كل البنات تكون حب فى حب".