برنامج القاهرة اليوم : من عمرو أديب ل هشام قنديل : ارحل واتق الله فينا

شن الإعلامى عمرو أديب هجوما حادا على رئيس مجلس الوزراء الدكتور هشام قنديل، على خلفية حادث البدرشين، قائلا: يا رئيس الوزراء أنت قاعد ليه هو أنت قاعد عشان تشيل شيلة ارتفاع الأسعار والأزمات كلها، أمش وأتق الله فينا، إحنا مش عايزين رئيس وزراء يتبرع بالدم، إحنا عايزين رئيس وزراء عنده دم ويجب إقالة رئيس الوزراء لأنه غير كفء.
وأضاف أديب بانفعال شديد، خلال فقرة الانترو ببرنامج "القاهرة اليوم": يا رئيس الوزراء خلى عندك دم وروح قدم أنت استقالتك، مكمل ليه من أول يوم وأنا قولت اختيار قنديل لرئاسة الوزراء غلط، هذا رجل لم يصلح لرئاسة مؤسسة أنت ليه معندكش إحساس، يا أخى حس شوية واستقيل وأمشى، إية ابتسامة رئيس الوزراء الملازمة له دائما ومش رئيس الوزراء بس المسئول، اللى عينك هو كمان مسئول وهو شايف فشلك يوم بعد يوم وساكت".
وتابع أديب هذا البلد للأغنياء فقط، يا رئيس الجمهورية أنت من عائلة فقيرة وتعلم إحساس فقدان الأم البسيطة لابنها، فالفقير فى البلد دى زى "الحيوان"، لو كان اللى فى القطر ناس مهمة كنتم اتحركتم أسرع من كدا، فالفقراء بس هم اللى يجرالهم كل حاجة وحشة والفقير فى البلد دى ريحته وحشة، فالفقراء هما بس اللى يكونوا جنود أمن مركزى، هذه بلد لا يحترم الفقير وينداس عليه بالجزم.
واستكمل أديب، أن رئيس الدولة ذهب للمستشفى بطيارة وفقراء القطار الموتى والمصابين متنقلوش فى طيارة، لأنهم مسئولى هذا البلد غير قادرين على حماية الفقراء وتأمين حياتهم.