اخبار المنوعات : اعمل حسابك.. مش هندخلك جامعة خاصة!

"متحلمش إنك هتدخل جامعة خاصة"
"خليك متأكد إن التنسيق هو اللي هيحدد مصيرك مش الفلوس"
"مستحيل ندفع فلوس في جامعات مش معترف بشهادتها"..
هذه بعض من "التهديدات" التي يوجهها الآباء والأمهات إلى أولادهم في أول أيام الثانوية العامة لحثهم على بذل أقصى مجهود لديهم، للحصول على مجموع يمكنهم من دخول الكليات الحكومية التي يرغبوا في الدخول إليها، ولكي يبعدوا عن أنفسهم "متاهات" دخول الجامعات الخاصة.
تحدثت (الوفد) مع مجموعة من طلاب الثانوية العامة لمعرفة قصصهم مع أولياء أمورهم حول هذه التهديدات..
"أجيبلك فلوس منين"
في البداية يقول مصطفى عبد الغني، 16 سنة: "أنا جبت 90 % في تانية ثانوي السنة دي، يعني المفروض إنه مجموع معقول نسبيا، لكن من ساعة ما والدي شاف التنسيق بتاع السنة ديه مرتفع أوى، وهو من ساعتها بيلمحلي إنه المفروض أفكر في حاجة غير هندسة، لأني مجموعي يعتبر ضعيف، طبعا أنا رفضت الفكرة نهائي وقلتلوا أنا مقدرش أتخيل نفسي غير مهندس، ده حلم حياتي، وطلبت منه أني لو مقدرش أجيب مجموع يدخلني هندسة حتى محافظات، يدخلني هندسة خاصة".
يكمل: "أنا قلت كده من هنا وكأني غلطت فيه، وأتحول لواحد تاني خالص، وقال إن اللي عايز يدخل حاجة يتعب ويموت نفسه عشانها، أنا كفاية أوي عليا فلوس دروسك اللي واخدة نص مرتبي، أجبلك منين 15 ألف كل سنة في جامعة خاصة ده غير تكاليف الدراسة والمشاريع نفسها، وكرر عبارة (من دلوقتي أعمل حسابك أني مش هدخلك جامعة خاصة)".
"جالي حالة اكتئاب"
ويروي كريم منصور، 15 سنة: "والله أنا تعبت من كتر الكلام في الموضوع ده، كل ما والدتي تشوف وشي سواء أنا رايح الدرس أو راجع من الدرس تسمعني كلمتين ملهومش لازمة عن ظروف والدي، وأني لسه عندي 3 أخوات أصغر مني محتاجين مصاريف، وإني لازم أتقي ربنا في مذاكرتي عشان مستحيل والدي يقدر يدخلني جامعة خاصة زي أقاربنا، وكلام بقى من ده كتير لغاية لما جالي حالة اكتئاب وتوتر".
ويتابع بحزن: "أنا فعلا مبقتش عارف أركز في حاجة من كتر القلق إني مقدرش أجيب مجموع يدخلني كلية محترمة، لأن ساعتها هيبقى مستقبلي ضاع فعلا".
"غير معترف بشهادتها"
"مستحيل أدفع فلوس في جامعات غير معترف بشهادتها".. هكذا كان رد فعلا والد أحمد عبد القادر، 16 سنة ، عندما تناقشا معا في فكرة دخول جامعة خاصة.
يقول أحمد: "والدي لسه عايش في الزمن الجميل وفاكر إن شهادات الجامعات الحكومية لسه ليها قيمة زي الأول، وإني بمجرد ما أنا هتخرج هلاقي الوظيفة المحتر مة منتظراني، عشان كده هو رافض تماما دخولي جامعة خاصة، لكن لو أنا فعلا مقدرتش أجيب مجموع محترم يدخلني حاجة كويسة، عمري ما هرضى أدخل حاجة غير جامعة خاصة، لأني مؤمن تماما أني مبقاش في فرق بين شهادة الجامعة الحكومية عن شهادة الجامعة الخاصة، بل بالعكس الأخيرة تكون أفضل بكثير خاصة أنها تتيح فرص تدريب في شركات كبرى مما يمكني من العمل في هذه الأماكن بعد التخرج على عكس الجامعات الحكومية التي تكتفي بطريقة التعليم التقليدية".