خاص | تعليق ناري من مرتضى منصور على استقالة العماري

اعرب مرتضى منصور رئيس نادي الزمالك عن رضائه التام لقرار استقالة العضو مصطفى العماري من مجلس ادارة النادي اليوم.
وكان مصطفى سيف العماري اعلن استقالته اليوم من مجلس الزمالك اعتراضاً على ما وصفه بتمثل الاغلبية في شخص رئيس النادي.
وقال رئيس الزمالك: استقالة مصطفى سيف مقبولة بالاجماع.. واتمنى انه يتمسك بموقفه وميتراجعش عنه وهو عمل الخطوة دى عشان عارف انه مجمد من اجتماع المجلس اللى فات وكان هيشطب ونفس الامر بالنسبة لابوه هيتحول للتحقيق بسبب اهانته لاعضاء المجلس كلهم عن طريق اتصالاته لهم.
وتابع: قبل كدة كان بينزل انتخابات ومش بينجح اللى نجحه انه موجود فى قائمتى.
وأوضح قائلاً: الزمالك هو النادى الوحيد اللى عنده رقابة ادارية فى النادى وخضع للتفتيش من قبل الجهاز المركزى للمحاسبات، وانا لو عملت جمعية عمومية بكرة هيجيلى 50 الف عشان الناس عارفة انا عملت ايه للنادى والجمهور والاعضاء واثقين فيا.
وأضاف: مش عايز افكر فى الامور الصغيرة دى بداية الدورى تعتبر بكرة وهو قبل اى ماتش مهم لازم يعمل القلق ده بس كل ده مش هيأثر فينا عايزين نركز فى فريقنا.
وحول أزمته مع لجنة الحكام، قال رئيس الزمالك: مفيش اى اعتراض على الحكم ابراهيم نور الدين معندناش مشكلة معاه والامور انتهت وكل الثقة فى رضا البلتاجى رئيس لجنة الحكام.
وأتم: الناس كلها شافت انا عملت ايه عشان جمهور الزمالك يدخل الماتش اللى فات لدرجة اننى هددت بعدم لعب المباراة.. مفيش اى مشكلة حصلت مع رجال الامن او فلكون بسبب متابعتى لكل شئ خاص بالجمهور او الصحفين او اى حد.. وده جاء نتيجته النهاردة وكل العالم بيتكلم عن جمهور الزمالك.