تصوير: سارة عبدالباقي دافع اسماعيل يوسف مدير الكرة بنادي الزمالك عن نفسه وعن باقي أفراد الجهاز الفني ولاعبي الفريق، لخوضهم مباراة الزمالك وإنبي بالتزامن مع أحداث مذبحة الدفاع الجوي، مذكرًا الإعلاميين بواقعة انسحاب الزمالك والإسماعيلي من مباراتهما معًا بعد علم الجهاز الفني للزمالك الذي كان هو أحد افراده بوقوع مذبحة ستاد بورسعيد. وتابع يوسف: "عندما تحركنا بالأتوبيس لاستاد الدفاع الجوي فوجئنا بمجموعة من جماهير الزمالك بتقولنا متتحركوش عايزين تذاكر حصل بعض الاشتباكات ووقعدوا قدام الأتوبيس واحنا طلبنا من سواق الاتوبيس ميتحركش عشان ممكن حد يتصاب وفضلنا متعطلين لحد ما وصلت المدرعات". وأكمل: "الأتوبيس اتملى غاز ونزلنا وبعض اللاعيبه حصلت لها مشاكل وركبت انا وعمر وحازم الأتوبيس والباقي في المدرعة ولحد اللحظة دى مجتلناش أى أخبار ان في حد مات أو حتى اتصاب". وأضاف: "قولت لسيادة المستشار ان حالة اللاعيبه صعبة جدا وأبلغنا ان المباراة تأجلت ربع ساعة وان اللى حصل اشتباكات خفيفة ونزلنا المباراة فوجئت بعلاء عبدالغني بيبلغنى ان عمر عنده مشكلة في التنفس مش قادر يلعب فنزلتله الملعب وسألته في حاجه قالى انا تعبان وايدي بتترعش ورجلي مش شايلاني فقولتله خلاص مفيش مشكلة والكابتن صلاح طلب من حازم إمام يسخن وبدأت المباراة". وتابع: "بين الشوطين اخواتنا الصحفيين محدش فيهم بلغنا ان في مشكلة، وأثناء المباراة في الدقيقة 52 بعض الجماهير نادى على عمر وراحلهم وبعدين كابتن صلاح طلب منه يسخن وبعد المباراة حسينا ان في مشكلة". وأكد يوسف أنه اثناء المباراة وبين الشوطين يكون هناك شاشات عرض في غرف الملابس يذاع عليها ما يعرض على قناة MBC Masr مشيرًا إلى أنه لم يذع أى شيء عن وقوع قتلى. واختتم: "هناك مشكلة أخلاقية صدرت لنا عن اللعب ونحن نعلم ان هناك من سقطوا ضحايا وهو غير صحيح، وأقول ذلك شهادة لله سبحانه وتعالى لأن اللاعبين خاضوا المباراة تحت ظروف نفسيه صعبة جدًا وخرجوا بها لبر التعادل".