تصريحات سليمان وهدان عن مصير فيريرا وانتظار مرتضى منصور تقلب الفيس بوك بغضب زملكاوي ..طارق يحيي : لعيبة الزمالك "معندهمش نخوة بصراحة احنا قرفنا "

تصريحات سليمان وهدان عن مصير فيريرا وانتظار مرتضى منصور تقلب الفيس بوك بغضب زملكاوي


سارة عبد الباقي

جاءت تصريحات سليمان وهدان عضو مجلس إدارة نادي الزمالك والقائم بأعمال رئيس النادي، لتزيد من غضب جماهير الزمالك، التي انفجرت بالأمس عقب خسارة الفريق الأول من شباب بلوزداد الجزائري ووداع دوري أبطال إفريقيا من دور المجموعات على غرار آخر نسختين.
وكان وهدان صرح لبرنامج جمهور التالتة وقال أن تسريب عقود لاعبي الزمالك من خلال ممدوح عباس رئيس الزمالك السابق، سبب رئيسي في الخسارة، لأن التسريب أفقد لاعبي الزمالك تركيزهم، كما خرج بتصريح آخر زاد من حدة الغضب .
وقال وهدان : "سنتخذ رأي المستشار مرتضى منصور في القرارات الخاصة بالفريق بعد توديع دوري أبطال إفريقيا، لإنه مازال رئيس نادي الزمالك ".
وكتبت صفحة إيطاليان زملكاوي، رداً على تصريحات وهدان: "تصريح يبين قد إيه العقلية اللي بتدير الزمالك حالياً".
فيما انفجر مشجع زملكاوي يدعى عمر، وكتب عبر حسابه على تويتر: "انا مشكلتي كبيرة حقيقي اني معرفش ان في عضو مجلس ادارة اسمه سليمان وهدان واول مرة يمر عليا.. كيف نمى في نادينا هذا الكم من الكومبرسات؟ الراجل ازاي غير ديموغرافية النادي وخلاه بهذا المسخ؟ ازاي ولاد النادي الي صمد اتهان والبقية صمت.. ازاي وصلنا للمرحلة المبكية دي والله!".
وتابع: "تجربة مرتضى في الزمالك تنفع تتحط في كتب السياسة بدون مبالغة عن كيفية تمسيخ كيان كامل والقضاء على المعارضة ويصبح هو الرمز الوحيد ويستغل النادي دا لصالحه ويدمره ومحدش يقدر يتكلم انا مش مصدق ان علاء مقلد وسليمان وهدان ومحمد خلفان واي اسم ثنائي في جرس موسيقي يبقى عضو وكباتن النادي لا، شئنا ام ابينا وانا مبحبوش للاسف، بس حازم امام فين يا جدعان سليل اكبر عيلة زملكاوية؟ وازاي شعبيته انهارت؟ بلاش، فين كباتن التمانينات والسبعينات؟ نصهم يا في القناة يا مختفي تماما، طب فين حتى لاعيبة الرياضات الاخرى هشام نصر وحسين لبيب وحسين ذكي وغيرهم؟، يحرق الديموقراطية الي تجيب علاء مقلد ومرتضى، الكوادر كتيرة وكلها كويسة، حسين لبيب ده في ست شهور كان &(&! ازاي الموسيقار اقنع قطاع كبير بان اما انا او الفوضى؟ مين سليمان وهدان دا يا جدعان هتجنن والله".
طارق يحيي : لعيبة الزمالك "معندهمش نخوة بصراحة احنا قرفنا "
شن طارق يحيى نجم الزمالك السابق، هجوما عنيفا على لاعبي الفريق والجهاز الفني بقيادة فيريرا بعد الخروج الأفريقي والخسارة أمام شباب بلوزداد بثنائية نظيفة.
وقال طارق يحيى: "واضح انه موسم للنسيان، لا فيه لعيبة عندها نخوة ولا روح ولا عندك مدير فني عمال يألف، محدش يزعل مني، مدرب عقيم، ولا فيه تكتيك ولا أي حاجة، احنا بمنروحش للجون يا جماعة، الكرة اللي روحنا بيها كرة ميتة من الجزيري وضيعها، مش شايف أي حاجة، مش شايف أي روح في الملعب".
وأضاف يحيي : "عملنا من الفريق أبطال، ده مش نادي الزمالك، تشكيلات غريبة، طرق لعب غريبة، لو مدرب فين اللعيبة فين النخوة فين الرجولة بتاعتكم، محدش متأخر عليكم بحاجة وبنطلعكم بطيارات خاصة، ايه القرف ده بصراحة الواحد قرف، ده مش نادي الزمالك ولا لعيبة الزمالك".
وتابع طارق يحيى هجومه: "في ايه؟ مالكم في ايه؟ الفرقة مش مع بعض كده رجالة، اخد الكرة واديها للمنافس، مش لاقي حاجة أقولها والناس كلها تعبت الوضع بقى صعب جدا، والمستشار مرتضى ربنا يرجعه بالسلامة ولازم قرار، الموضوع عدى وراح في حتت بعيدة مش هنعرف نلمها تاني".
واختتم: "حرام عليكم جمهور الزمالك اتقوا الله فيه، جمهور الزمالك عايز يفرح ومحدش قصر معاكم بس واضح إن في شوية لاعيبة معندهاش حمية ولا في أي شغل كويس"