حوار| فراس سعيد: مبحبش اتفرج على نفسي.. وياريت الناس تسيب شيرين في حالها

يُعد الفنان فراس سعيد واحدًا من أبرز الوجوه الفنية التي أثبتت حضورها بقوة في الدراما والسينما العربية خلال السنوات الأخيرة، بفضل أدائه المتقن وقدرته على تجسيد الشخصيات المركبة والمتنوعة باحتراف وبراعة لافتة، حيث نجح في تحقيق مكانة خاصة لدى الجمهور والنقاد على حد سواء، بفضل اختياره الدقيق لأدواره وحرصه الدائم على تقديم أعمال تضيف إلى رصيده الفني، والتي يتميز بأدائه الهادئ والعميق الذي يمنحه قدرة فريدة على ملامسة وجدان المشاهد، حيث يترك بصمة مميزة في كل عمل يشارك فيه، سواء في الدراما أو السينما، من خلال شخصيات مؤثرة وأداء صادق يعكس خبرته وموهبته الكبيرة.
أجرت "بوابة أخبار اليوم" حوارًا خاصًا مع الفنان فراس سعيد، كشف خلاله عن الخطوط الحمراء التي يحرص على عدم تجاوزها في أعماله الفنية، وتحدث عن الأدوار التي يحلم بتقديمها في المستقبل، كما وجه رسالة خاصة للفنانة شيرين عبد الوهاب وجمهورها، وتناول الحوار أيضًا عددًا من القضايا الفنية المهمة المرتبطة بمسيرته وتجربته الدراما والسينما، وفيما يلي نص الحوار الكامل.
في البداية.. ما سبب ابتعادك عن الساحة الفنية خلال الفترة الأخيرة؟
" أنا ما اختفيتش عن الأعمال الفنية، قدمت مسلسل " فرح ليلى" وبعده قعدت حوالي 3 سنين ما قدمتش غير أعمال رومانسية، لأني نجحت في النوع ده، وجالي عروض كتير جدًا في نفس الإطار، بعد كده قصيت شعري وقدمت شخصيات رعب وشر، وبقالى 4 أو 5 سنين مش عارف أخرج من دايرة الشر، نفسي أرجع للرومانسي أو للكوميديا جدًا، بس المشكلة إن لما الفنان ينجح في نوع معين المؤلفين بيعرضوا عليه نفس النوع، يا جماعة أنا مش شرير، أنا بعرف أقدم أدوار الشر، لكن ده لا يعني إني شرير، وبقديها تمثيل وضرب بس".
هل هناك عمل تمنيت لو إنك ما شاركتش فيه؟ ولماذا؟
" ندمت على بعض الأعمال اللي شاركت فيها، كنت متوقع منها حاجة مختلفة تمامًا، لكن فوجئت إنها اتقدمت بشكل تاني غير اللي كنت متخيله. بس الحالات دي، والحمد لله دلوقتي الأمور بقت محسوبة أكتر، والصناعة عندنا بقت قوية جدًا، وبقينا نشوف احترافية حقيقية في الفن، كمان الوقفات اللي حصلت في السينما والدراما أنجبت جيل جديد مميز، لأننا دلوقتي عندنا شباب كتير موهوبين، سواء ممثلين أو مخرجين أو كتاب، وده شيء يفرّح بصراحة".
هل في خطوط حمراء بتمنعك من قبول بعض الأدوار؟
" أنا شايف إن الصناعة، سواء هنا أو في الخارج، لازم تراعي طبيعة المجتمع اللي بنعيش فيه،، يعني لو في حاجة ممكن تكون خارجة أو تخدش الأدب والأخلاق والدين والعادات والتقاليد بتاعتنا، الأفضل إننا ما نقدمهاش ولا نعرضها".
ما هي الشخصية التي تحلم بتجسيدها في عمل فني ولماذا؟
" نفسي جدًا أقدّم شخصية تاريخية زي خالد بن الوليد، أو شخصية مركبة زي مريض بالفصام، لأن النوع ده من الأدوار بيخليني أعيش تفاصيل جديدة ومختلفة، كمان نفسي أقدم عمل أكشن بطريقة معينه، لأن الممثل دايمًا بيبحث عن التنوع والتجديد، ولكن المشكلة إن الصناعة والمشاهدين أحيانًا بيحبوا يشوفوا الفنان في نوع معين من الأدوار بسبب نجاحه فيها، ويمكن علشان لسه ما شافونيش في الأدوار التانية اللي نفسي أجربها".
اقرأ أيضا| بعد اتجاهه للتأليف والإخراج.. ممثل مسرح مصر يوضح سبب غيابه عن التمثيل |خاص
ما الرسالة التي تود توجيهها ل شيرين عبد الوهاب ولجمهورها؟
"أحنا بنحبك جدًا، وعايزك تفتكري دايمًا إن الشعب كله بيحبك وواقف جنبك، ومفيش حاجة في الدنيا تستاهل الزعل، ويا ريت الناس تسيبها في حالها شوية، وكفاية كلام وبوستات عنها على السوشيال ميديا، لأن الضغط اللي بنعيشه في شغلنا صعب جدًا، ومش دايمًا مفيد".
البعض بيقول إنك ما بتتابعش شغلك على الشاشة.. هل ده حقيقي؟
"أنا بحس إن الفنان أكتر واحد بيكون قاسي على نفسه، لأننا دايمًا بنسعى نكون أفضل في كل مرة، أنا شخصيًا مش بحب أتفرج على نفسي في التلفزيون، ومش دايمًا بصدق أدائي إلا لما حد يقولي إن المشهد كان حلو، ساعتها بس بدخل أشوفه، يمكن ده بسبب إن الفنان بطبيعته ناقد لنفسه، وده اللي بيدفعه للتطور، بس في نفس الوقت لازم يعرف إزاي يوازن وما يجلدش نفسه زيادة عن اللزوم".
وأخيرا.. ما أعمالك الجديدة ؟
"حالياً بقرأ مجموعة من السيناريوهات الجديدة، ولسه في مرحلة دراسة واختيار، ومحددتش بشكل نهائي العمل اللي هقدمه الفترة الجاية.
بحاول أختار حاجة تكون مختلفة وتضيف لتجربتي الفنية، وتكون على نفس مستوى الأعمال اللي قدمتها قبل كده أو أقوى".