أمينة خليل: "باخد موافقة زوجي قبل نزول صوري"

علقت الفنانة أمينة خليل على مرور أربعة أشهر على زواجها من المصور أحمد زعتر في نهاية مايو الماضي، قائلة: "الأمور ماشية كويس الحمد لله".
وأضافت خلال لقائها ببرنامج "الصورة" الذي تقدمه الإعلامية لميس الحديدي على شاشة "النهار": "بصراحة من وقت الجواز كان فيه أحداث كتير، وبنخرج من حاجة لحاجة، مش لاحقين نستقر. لما نخلص مهرجان الجونة السينمائي والقاهرة السينمائي، هنستقر ونقعد شوية في البيت".
وردًا على سؤال الحديدي حول سبب إقامتها حفل زفاف في مصر وآخر في اليونان، قالت: "كنت حريصة أعمل فرح في مصر لكل عيلتي والناس اللي في الشغل اللي بعتبرهم عيلتي، وكنت مهتمة إن الناس اللي بحس إني بنتهم يفرحوا معايا".
أكملت : "وفي نفس الوقت كنت عايزة أعمل حاجة احترامًا لزوجي أحمد، اللي ما اختارش الأضواء اللي أنا فيها، لكنه اختارني أنا. فكنت عايزة أعمل إيفينت لأصحابنا المقربين جدًا من غير كاميرات ولا أضواء، ودي حاجة مريحة ليا وليه".
فسألتها الحديدي مازحة: "دي قصة حب لطيفة؟" لترد أمينة: "اشتغلنا مع بعض زمان مرة، وفضلت بينا صداقة، والموضوع كان بسيطا. اتكلمنا في التليفون وفضلنا نحكي لحد ما الموضوع كمل".
وعن معايير الاختيار في الزواج، قالت: "أنا وسط البنات اللي في جيلي تأخرت شوية في الجواز، وكان فيه مرات ربنا مكتبش نصيب، لكن ربنا كان كاتب النصيب مع أحمد زعتر. وصلت للمرحلة اللي مابقاش فيها صراع بين العقل والقلب، وساعتها حسيت إني ماشية في الطريق الصح".
وأضافت: "عدم وجود الصراع ده ماكانش لحظة، لكنه حصل مع الوقت تم بناؤه. قعدنا واتكلمنا كتير، ولما الواحد بيكبر بيبص بنظرة مختلفة، والأولويات بتتغير عما كنت بنت عندها 24 أو 25 سنة"؛ قاطعتها الحديدي وسألتها: "زي إيه الأولويات؟" فأجابت أمينة: "التفاهم، والنقاش، وطريقة التفكير. إن الشخص يكون صديقا أقدر أعيش معاه وأحس بالأمان. وأنا صغيرة مكنتش بحكم بالطريقة دي".
واصلت : "الواحد لما بيكبر بيكتشف إنه بيتجوز عيلة مش شخص بس. لازم يكون فيه تناسق اجتماعي بين الأسرتين".
اردفت : "كمان أحمد أخدني وأنا في مرحلة نجاح، فلازم يكون شخص مقدّر ده، ومش هيبقى فيه نوع المشاكل اللي بتحصل لما الاتنين لسه بيبنوا نفسهم".
واختتمت أمينة خليل قائلة: "المعادلة أخدت وقت، لكن بحمد ربنا وبقول كل تأخيرة فيها خيرة"، وعلّقت الحديدي: "أعتقد إن احترامه لشغلك كان نقطة مفصلية، خصوصًا وأنا عارفة شخصيتك"، لترد أمينة: "جداً، دي كانت نقطة مهمة جدًا، وواجهت بسببها مشاكل قبل كده. كنت حساسة ناحية الموضوع ده، لكن أحمد زعتر مختلف، ومبسوطة جدًا إنه في عالم الفن بس مش فنان".
ولفتت أن زوجها رغم أنه ليس ممثلا لكن وجوده في عالم الفن جعله يقدر طبيعة عملها قائلة : "مواعيدي وغيابي لطبيعة العمل أحيانا بغيب اشهر ومش اي شخص ممكن يتفهم ذلك بسهولة حتى اللحظات الي ممكن اقوم فيها بدور معين ممكن ابقى مش عاوزة أتكلم أو محتاجة أركز او دور يؤثر في اثناء فترة التصوير وبالتالي لازم يكون شخص يقدر ذلك وبالتالي يكون داعما لي وأطلع أحسن ما فيا".
وأوضحت أن زوجها أحمد زعتر لا تزعجه الاضواء حولها قائلة : "الأضواء علي لا تزعجه بالعكس تماماً بيكون داعما لي بشكل كبير جداً بالعكس باخد رأيه في حاجات كتيرة جداً واي صورة بنزلها دلوقتي لازم يقلي "أوك" لكن بالعكس عاوزني أحسن حد".
اقرأ أيضًا | أمينة خليل تكشف حقيقة حملها.. كنت لابسة ضيق | صور