«حساسية بالدم».. ملك أحمد زاهر تكشف تفاصيل أزمتها الصحية

أوضحت الفنانة ملك أحمد زاهر تفاصيل حالتها الصحية بعد تعرضها لأزمة مفاجئة خلال الأيام الماضية دخلت على إثرها المستشفى مشيرة إلى أنها تعاني من حساسية في الدم.
وكشفت ملك تفاصيل الأيام الصعبة التي مرت بها مؤخرًا وكتبت عبر خاصية استوري على صفحتها الشخصية على «انستجرام»: "أنا والله ما كنت متوقعة كل اللي حاصل ده أنا لما حبيت أشارك حالتي الصحية كان عشان أنا كنت مخضوضة جدا على نفسي وفكرة إن لا أنا ولا الدكاترة حتى عارفين أنا عندي إيه كانت رعباني".
وتابعت: "كنت محتاجة بس أوصلكم إن حياتي فيها الحلو وفيها الوحش وقلت في الستوري إن الموضوع مش الغرض منه القلق وإني مش عايزة حد يقلق عليا أنا كويسة وعندي يقين في ربنا إنه هيقومني بالسلامة وإن شاء الله تبقى حاجة بسيطة بس من خضتي كتبت مع إن دي مش طبيعتي إني أشارك الحاجات السلبية عموما".
واستكملت حديثها موجهة الشكر لكل من دعمها ودعا لها بالشفاء قائلة: "أنا بس مش عارفة أقول إيه ولا إيه من قلبي بشكر كل حد سأل عليا ودعالي والله كله كان بيوصلني وأنا أسفة لو مردتش على حد وبشكر كل زمايلي وأساتذتي اللي كانو بيسألوا عليا كل يوم ومسابونيش لحظة وكل صحابي وعيلتي اللي كانو جنبي".
وأضافت مطمئنة جمهورها: "أنا الحمدلله بقيت أحسن من الأول وبطلت أروح المستشفي الحمدلله بحمد ربنا إنها جت على قد كده حتى لو الأيام اللي فاتت كانت صعبة واللي عندي ده حاجة مخيفة شوية وخضتنا بس برضو أنا كويسة والحمدلله أنها جت لحد كده".
وكشفت سبب مرضها قائلة: "ربنا حماني من حاجة أكبر وأهم حاجة إذا عرف السبب بطل العجب والحمد لله أننا عرفنا.. هي حساسية شديدة في الدم الموضوع معقد شوية بس أنا مطمنة أنا بخف وبتحسن كل يوم الحمد والشكر الله ومفيش حاجة خطيرة بإذن الله".
واختتمت حديثها قائلة: "أنا أسفة لو كنت قلقتكم بس ده مكانش الغرض أبدا والله شكرا من كل قلبي على الحب ده أنا عرفت غلاوتي عندكم وعند كل اللي حواليا بشكركم من كل قلبي".
خروج ملك زاهر من المستشفى
وكانت هدى زاهر قد كشفت عن الحالة الصحية لابنتها معلنة خروجها من المستشفى موضحة عبر خاصية استوري على صفحتها الشخصية على انستجرام قائلة: "ملك خرجت ولله الحمد والشكر من يومين وفي انتظار تقارير الاطباء عن الحالة بالظبط هي أحسن وهتكون أحسن ببركة دعائكم ليها ومحبتكم" مضيفة: "ان شاء الله التحاليل الاخيرة تعرفنا ايه السبب اللي عمل فيها كدة وأنا متفائلة بالله جدا وعارفة أن رب الخير لا يأتي الإ بالخير".
وتابعت قائلة: "الحياة بتستمر والشغل والالتزامات بتستمر رغم كل الظروف".